काठमाडौं । मध्यक्रमका भरोसायोग्य ब्याटर रवि बोपाराको उत्कृष्ट अर्धशतकको बलमा चितवन राइनोजले नेपाल प्रिमियर लिग (एनपीएल) अन्तर्गत विराटनगर किंग्सविरुद्ध १७५ रनको चुनौतीपूर्ण लक्ष्य प्रस्तुत गरेको छ ।
बुधबार कीर्तिपुरस्थित त्रिवि क्रिकेट मैदानमा टस हारेर पहिले ब्याटिङमा उत्रिएको चितवनले निर्धारित २० ओभरमा पाँच विकेट गुमाउँदै १७४ रनको प्रतिस्पर्धात्मक योगफल तयार गर्यो ।
चितवनका लागि बोपाराले ३८ बलमा तीन चौका र चार छक्का प्रहार गर्दै ६५ रनको प्रभावशाली पारी खेले । यो एनपीएलको दोस्रो संस्करणमा उनको लगातार तेस्रो अर्धशतक हो। यसअघि उनले कर्णाली याक्स र लुम्बिनी लायन्सविरुद्ध पनि अर्धशतक बनाएका थिए ।
बोपाराले ६६–३ को अवस्थामा सैब जैबसँग ४९ रनको साझेदारी गर्दै इनिङ उकासे । त्यसपछि उनले ११५–४ को स्थितिबाट पाँचौँ विकेटका लागि ५६ रनको महत्वपूर्ण साझेदारी गर्दै चितवनलाई चुनौतीपूर्ण स्कोरसम्म पुर्याए । जैबले ३२ रन बनाए ।
कप्तान कुशल मल्लले १४ बलमा एक चौका र एक छक्कासहित २० रन जोड्दा, देव खनालले २२ बलमा २८ रन बनाए । डेविड मलानले पनि नौ बलमा तीन चौकासहित छिटो १७ रन थपे ।
बलिङतर्फ विराटनगरका कप्तान सन्दीप लामिछाने र मर्चेन्ट डे लिंगेले समान दुई–दुई विकेट लिए । सन्दीपले चार ओभर बलिङ गर्दै २४ रन खर्चिए। सुभव रन्जानेलाई एक विकेट मिल्यो ।
प्रतियोगितामा विराटनगर यसअघिका तीनै खेलमा जित निकाल्दै तालिकाको दोस्रो स्थानमा रहेको छ । पहिलो खेलमा पोखरा एभेन्जर्सलाई ५३ रनले, दोस्रो खेलमा काठमाडौं गोर्खाजलाई पाँच विकेटले तथा तेस्रो खेलमा साविक विजेता जनकपुर बोल्ट्सलाई नौ रनले पराजित गरेको थियो ।
चितवनले भने पहिलो खेलमा कर्णाली याक्सलाई चार विकेटले हराए पनि दोस्रो खेलमा लुम्बिनी लायन्ससँग ६ विकेटको हार ब्यहोरेको थियो । आजको खेलमा दुवै टोली आफ्नो लय कायम राख्ने लक्ष्यमा मैदान उत्रिएका छन् ।
प्रतिक्रिया