काठमाडौं । नेपाल राष्ट्र बैंकले मंसिर ११ गतेदेखि १०० रुपैयाँ अंकित दरका नयाँ नोट बजारमा पठाउने भएको छ। नयाँ नोट साबिककै आकार र रङमा उपलब्ध हुनेछ।
राष्ट्र बैंकका अनुसार संकेत नम्बर क/२० ०००००१ देखि घ/४० ९९९९९९ सम्मका नोट क्रमशः चलनचल्तीमा ल्याइनेछन्।
नयाँ नोटको बायाँ भागमा सगरमाथाको चित्र, दायाँ भागमा लालीगुराँसको पानी छाप, र मध्यभागमा नेपालको चुच्चे नक्सा समावेश गरिएको छ। नोटमा अशोकस्तम्भको चित्र पनि राखिएको छ र अंग्रेजीमा बुद्ध नेपालमा जन्मिएको जनाइएको छ । जसको वरिपरि सुरक्षा सम्बन्धी सूक्ष्म मुद्रण गरिएको छ।
दृष्टिविहीन व्यक्तिहरूले छामेर पहिचान गर्न सक्ने कालो थोप्ला बायाँतर्फ राखिएको छ। त्यसैगरी, अण्डाकार फ्रेमभित्र मायादेवीको सिल्भर मेटालिक चित्र समावेश गरिएको छ।
नोटमा राखिएको सुरक्षा धागो २ मिमि चौडा छ, जसलाई सिधा हेर्दा रातो र ढल्काएर हेर्दा हरियो रङ देखिन्छ।
नोटमा तत्कालीन गभर्नर महाप्रसाद अधिकारीको हस्ताक्षर छ भने तल्लो बोर्डरमा नेपालीमा “विसं २०८१” अंकित गरिएको छ।
माथिल्लो भागमा अंग्रेजीमार्फत नोटको प्रामाणिकता सूचित गर्ने सुरक्षा अक्षरहरू राखिएका छन्। नोटको मध्यभागमा एकसिङे गैँडाको माउ र बच्चाको चित्र थपिएको छ, जसलाई यस संस्करण नोटको प्रमुख आकर्षणको रूपमा हेरिएको छ।
राष्ट्र बैंकका अनुसार, ती सबै विशेषता सहितका १०० रुपैयाँका नयाँ नोट आजदेखि औपचारिक रूपमा बजारमा उपलब्ध गराइनेछन्।
प्रतिक्रिया