काठमाडौं । मधेस प्रदेश सरकार गठनसम्बन्धी विवादमा परेका रिटहरूको आज सर्वोच्च अदालतमा सुनुवाइ हुन लागेको छ।
न्यायाधीश हरिप्रसाद फुयाल र नित्यानन्द पाण्डेयको संयुक्त इजलासमा तीन अलग–अलग रिटलाई एकैसाथ राखेर सुनुवाइ हुन लागेको हो ।
यसअघि मंसिर २ गते सर्वोच्चले विपक्षी पक्षलाई मंसिर ९ गतेभित्र लिखित जवाफ पेस गर्न आदेश दिएको थियो। अदालतले मंसिर ११ गतेदेखि अन्तिम सुनुवाइ सुरु गर्ने जनाएको थियो।
मधेस प्रदेशसभाका ७४ जना सांसदले संविधानको धारा १६८ (३) अनुसार सरोजकुमार यादवलाई मुख्यमन्त्री नियुक्त गर्ने तत्कालीन प्रदेश प्रमुखको निर्णयविरुद्ध सर्वोच्च अदालतमा रिट दायर गरेका थिए। सर्वोच्चले पहिलो चरणमै मुख्यमन्त्री यादवलाई मुद्दाको टुंगो नलागेसम्म नीतिगत तथा दीर्घकालीन निर्णय नगर्न अन्तरिम आदेश जारी गरेको थियो ।
कात्तिक २४ गते तत्कालीन प्रदेश प्रमुख सुमित्रा सुवेदी भण्डारीले बिहान झिसमिसेमै बर्दिबासस्थित एउटा होटलमा यादवलाई शपथ गराएपछि विरोध भएको थियो ।
प्रतिक्रिया