काठमाडौं । नेपाल प्रिमियर लिग (एनपीएल) दोस्रो संस्करणअन्तर्गत लुम्बिनी लायन्सले सुदूरपश्चिम रोयल्सविरुद्ध ब्याटिङ पावर प्लेमा मध्यम सुरुआत गरेको छ । बिहीबार कीर्तिपुरस्थित त्रिवि क्रिकेट मैदानमा टस हारेर ब्याटिङमा उत्रिएको लुम्बिनीले पहिलो ६ ओभरमा एक विकेट गुमाएर ५० रन बनाएको छ ।
हाल क्रिजमा रहेका ओपनर सुमित महर्जनले १६ रन जोडेका छन् । कप्तान रोहितकुमार पौडेलले १४ रन बनाएर खेलिरहेका छन् ।
त्यसअघि, पभेलियन फर्किएका ओपनर डीे’एर्सी शर्टले १८ रनको योगदान गरे ।
सुदूरपश्चिमका हमेन्त धामीले एक विकेट लिए । उनले सर्टको विकेट लिएका हुन् । सुदूरपश्चिम हालसम्म खेलेका तीनवटै खेलमा उत्कृष्ट प्रदर्शन गर्दै अंकतालिकामा शीर्ष स्थानमा छ ।
सुदूरपश्चिमले यसअघि काठमाण्डू गोर्खाजविरुद्ध २९ रन, पोखरा एभेन्जर्सविरुद्ध १८ रन र कर्णली याकक्सविरुद्ध ४५ रनको जित निकालेको थियो ।
लुम्बिनी लायन्सको प्रदर्शन भने मिश्रित देखिएको छ । तीन खेल खेल्दा लुम्बिनीले एक जित र दुई हार व्यहोरेको छ । आजको खेलमा पनि हार व्यहोरे लुम्बिनीको प्लेअफ समीकरण कठिन बन्ने निश्चित छ ।
लुम्बिनीले पहिलो खेलमा चितवन राइनोजविरुद्ध ६ विकेटको जित निकालेको थियो । दोस्रो खेलमा कर्णाली याक्सविरुद्ध नौ विकेट र तेस्रोमा काठमाण्डू गोर्खाजसँग २२ रनले पराजित भएको थियो ।
प्रतिक्रिया