लुम्बिनीलाई विराटनगरको दियो १४५ रनको लक्ष्य

काठमाडौं । नेपाल प्रिमियर लिग (एनपीएल)मा विराटनगर किंग्सले लुम्बिनी लायन्सविरुद्ध १४५ रनको लक्ष्य प्रस्तुत गरेको छ । बुधबार कीर्तिपुरस्थित त्रिवि क्रिकेट रंगशालामा टस हारेर पहिले ब्याटिङ गरेका विराटनगरले निर्धारित २० ओभरमा आठ विकेट गुमाएर १४४ रन जोडे ।

विराटनगरका लोकेश बमले सर्वाधिक ३५ रन बनाए भने साम हेजलेटले २७ रन जोड्दै इनिङ सम्हाल्न मद्दत गरे । यी दुईले १५-२ को अवस्थामा तेस्रो विकेटका लागि ५५ रनको साझेदारी गरेका थिए । बसिर अहमेदले २८ रनको योगदान दिए भने मर्चेन्ट डी लांगे १० रनमा अविजित रहे ।

पहिलो पटक विराटनगरबाट मैदान उत्रिएका दक्षिण अफ्रिकी स्टार फाफ डू प्लेसिसले भने १२ रनमात्र बनाए । लुम्बिनीका अभिषेश गौतमले तेस्रो ओभरमा उनलाई विकेटकिपर निरोशन डिकवेलाबाट स्टम्प गरिएका थिए ।

प्रतिश जिसीले ११ रन जोडे भने ओपनर जर्ज मुन्से पहिलो बलमै ‘डक’ भएर फर्किए । नारायण जोशीले पाँच रनको योगदान दिए । कप्तान सन्दीप लामिछाने एक बलमै छक्का प्रहार गर्दै ६ रनमा अविजित रहे ।

बलिङतर्फ लुम्बिनीका शेर मल्ल उत्कृष्ट प्रदर्शन गर्दै तीन विकेट लिए । उनले जर्ज मुन्से, नारायण जोशी र साम हेजलेटलाई पभेलियन फर्काए । योसँगै उनी सुदूरपश्चिमका अभिनाश बोहरासँगै ११-११ विकेटसहित एनपीएलको सर्वाधिक विकेट लिने खेलाडी बनेका छन् । रुबेन ट्रम्पेलमन, अभिषेश गौतम र जेजे स्मिथले एक-एक विकेट लिए ।

आजको खेल विराटनगरका लागि पाँचौँ जित हासिल गर्ने मौका हो । यसअघि विराटनगरले पोखरा, काठमाण्डू, जनकपुर र कर्णाली विरुद्ध जित निकालेको छ । चितवनसँग भने पराजित भएको थियो ।

यता, लुम्बिनी प्लेअफ सम्भावना जीवित राख्न जितको दबाबमा छ । पहिलो खेलमा चितवनलाई हराए पनि त्यसपछि लगातार तीन खेलमा पराजित भएको लुम्बिनीले पाँचौँ खेलमा पोखरालाई पराजित गर्दै पुनः लय समातेको थियो ।