काठमाडौं । दोस्रो संस्करणको नेपाल प्रिमियर लिग (एनपीएल) अन्तर्गत बिहीबार त्रिभुवन विश्वविद्यालय अन्तर्राष्ट्रिय क्रिकेट रंगशालामा दुई महत्वपूर्ण खेल हुँदैछन् । पहिलो खेल बिहान ११:४५ बजे पोखरा एभेन्जर्स र काठमाडौं गोर्खाजबीच हुनेछ भने दोस्रो खेल अपराह्न ४ बजे सुदूरपश्चिम रोयल्स र चितवन राइनोजबीच हुनेछ ।
पोखराको नेतृत्व कुशल भुर्तेलले गरिरहेका छन् भने काठमाडौंका कप्तान करण केसी हुन् । पाँच खेलबाट चार अंक मात्र जोडेको पोखरालाई प्लेअफ सम्भावना जोगाउन आजको खेल जित्नु अत्यावश्यक बनेको छ । काठमाडौं भने छ खेलबाट आठ अंकसहित मजबुत स्थितिमा रहेको छ ।
दोस्रो खेलमा प्लेअफमा पुगिसकेको सुदूरपश्चिम रोयल्स र प्लेअफ दौडमै रहेको चितवन राइनोज भिड्नेछन् । सुदूरपश्चिम दीपेन्द्रसिंह ऐरीको कप्तानीमा १० अंकसहित शीर्ष स्थानमा छ । उता पाँच खेलबाट चार अंक भएका चितवनका लागि भने जित्नैपर्ने बाध्यता रहेको छ ।
मंसिर १ देखि सुरु भएको एनपीएल दोस्रो सिजन २७ गतेसम्म निरन्तर भइरहेको छ । क्यानले प्रत्येक खेलका लागि ९ हजार ४५० टिकट बिक्री गर्दै आएको छ ।
प्रतिक्रिया