काठमाडौं । राजधानीमा जारी दोस्रो संस्करणको नेपाल प्रिमियर लिग (एनपीएल)अन्तर्गत आज दुई खेल हुने छन् ।
पहिलो खेल बिहान ११:१५ बजे त्रिभुवन विश्वविद्यालय अन्तर्राष्ट्रिय क्रिकेट रङ्गशालामा सुदूरपश्चिम रोयल्स र विराटनगर किङ्ग्सबीच हुनेछ। दीपेन्द्रसिंह ऐरीको कप्तानीमा अपराजित यात्रा कायम राखेको सुदूरपश्चिमसँग सन्दीप लामिछानेको नेतृत्वमा रहेको विराटनगर भिड्दै छ ।
पहिलो क्वालिफायरमा स्थानका लागि विराटनगरलाई आजको खेल अत्यन्त महत्वपूर्ण छ । आठ अंकसहित प्लेअफमा प्रवेश गरिसकेको विराटनगरले राम्रो रनरेटसहित जित निकालेमा सुदूरपश्चिमसँगै पहिलो क्वालिफायर खेल्नेछ, अन्यथा लुम्बिनी लायन्ससँग इलिमिनेटर खेल्नु पर्नेछ ।
सुदूरपश्चिम भने छ खेलबाट १२ अंक जोडेर शीर्ष स्थान सुरक्षित गरिसकेको छ र उसमा कुनै दबाब छैन ।
दोस्रो खेल दिउँसो ३ः३० बजे चितवन राइनोज र पोखरा एभेन्जर्सबीच हुनेछ । कप्तान कुशल मल्लको नेतृत्वमा रहेको चितवन र कुशल भुर्तेलको कप्तानीमा रहेको पोखराको यो खेल ‘प्रतिष्ठाको लडाइँ’ मात्र हुनेछ, किनकि दुवै टिम प्लेअफबाट बाहिरिसकेका छन् । दुवैको छ खेलबाट चार-चार अंक मात्र रहेको छ ।
एनपीएलका सबै खेल कीर्तिपुरस्थित त्रिवि मैदानमा दिउँसो र राति गरेर भइरहेको छन् । नेपाल क्रिकेट संघ (क्यान)ले प्रत्येक खेलका लागि ९,४५० टिकट बिक्री गरिरहेको छ । मंसिर १ बाट सुरु भएको प्रतियोगिता २७ गतेसम्म चल्नेछ ।
प्रतिक्रिया