कर्णालीले जनकपुरलाई दियो १३० रनको लक्ष्य

काठमाडौं । नेपाल प्रिमियर लिग (एनपीएल) दोस्रो संस्करणमा कर्णाली याक्सले साविक विजेता जनकपुर बोल्ट्सविरुद्ध १३० रनको लक्ष्य प्रस्तुत गरेको छ । आइतबार कीर्तिपुरस्थित त्रिवि क्रिकेट रंगशालामा टस हारेर पहिले ब्याटिङमा उत्रिएको कर्णालीले निर्धारित २० ओभरमा नौ विकेट गुमाउँदै १२९ रनको योगफल बनाउन सफल भयो ।

कर्णालीका ओपनर इम्रान शेखले सर्वाधिक ३३ रन बनाए भने गुल्सन झाले १९ रन थपे । कप्तान सोमपाल कामी १८ रनसहित अविजित रहे। त्यस्तै प्रियांक पन्चालले १६, विलियम बोसिस्टोले १५ र नजीबुल्लाह जाड्रानले १३ रन योगदान गरे ।

बलिङतर्फ जनकपुरका ललित राजवंशी र आदित्य महताले दुई-दुई विकेट लिए । संगीथ कुरे, अनिलकुमार साह र माज सदाकतले एक-एक विकेट हासिल गरे ।

६ खेलबाट दुई अंकसहित तालिकाको सातौँ स्थानमा रहेको कर्णालीले यस सिजन एकमात्र जित लुम्बिनी लायन्सविरुद्ध समान नौ विकेटले निकालेको थियो ।

साविक च्याम्पियन जनकपुर बोल्ट्स भने यो सिजन कमजोर प्रदर्शन गर्दै तालिकाको पुछारमा छ । गत सिजन उपाधि जितेको जनकपुरले यसपटक ६ खेलमध्ये एकमा मात्र जित निकाल्न सकेको छ ।