काठमाडौं । नेपाल प्रिमियर लिग (एनपीएल) सिजन-२ अन्तर्गत मंगलबार सम्पन्न पहिलो क्वालिफायरमा सुदूरपश्चिम रोयल्सले विराटनगर बोल्ट्सलाई ७७ रनले पराजित गर्दै फाइनलमा स्थान सुरक्षित गरेको छ ।
त्रिवि अन्तर्राष्ट्रिय क्रिकेट रंगशालामा टस जितेर १५६ रनको लक्ष्य पछ्याउँदै खेलमा उत्रिएको विराटनगर १४ ओभर १ बलमै ७८ रनमा समेटियो । सिजनकै सबैभन्दा न्यून स्कोर बनाएको विराटनगरले सुदूरपश्चिमको उत्कृष्ट बलिङसमक्ष पूरा खेलभर दबाब झेल्यो ।
यसअघि लिग चरणको १५ औँ खेलमा काठमाडौं गोर्खाजविरुद्ध चितवन राइनोजले ८९ रन मात्रै बनाएको थियो, जुन सिजनको सबैभन्दा कम स्कोर मानिँदै आएको थियो ।
लिग चरणमा सुदूरपश्चिमलाई हराउँदै पहिलो क्वालिफायरमा स्थान बनाएको विराटनगर सुदूरपश्चिमसँगको हारको प्रतिकार गर्न असफल भयो । सुदूरपश्चिमले लिगमा हारेको खेलको बदला चुकाउँदै फाइनल टिकेट हात पारेको हो ।
पराजयपछि विराटनगर अब इलिमिनेटरको विजेतासँग दोस्रो क्वालिफायर खेल्नेछ । काठमाडौं गोर्खाज र लुम्बिनी लायन्सबीच हुने इलिमिनेटरबाट विजेता बनेको टिमसँग भिडेर मात्र विराटनगरले फाइनलमा फर्किने सम्भावना जिउँदो राख्नेछ ।
सुदूरपश्चिमको जितका नायक ओपनर बिनोद भण्डारी रहे। ५२ बलमा ३ चौका र २ छक्का प्रहार गर्दै ६३ रन जोडेका उनले १८ ओभरको अन्तिम बलसम्म क्रिज सम्हाले । उनकाे इनिङकै भरमा सुदूरपश्चिमले ७ विकेटको क्षतिमा १५५ रनको सम्मानजनक योगफल तयार पारेको थियो ।
सुदूरपश्चिमका शेल्डन ज्याक्सन र आरिफ शेखले समान २०-२० रन, हर्मितले १४ रन तथा ओपनर मुख्तार अहमदले १० रन जोडेका थिए ।
प्रतिक्रिया