काठमाडौं । नेकपा (एमाले)का अध्यक्ष तथा पूर्वप्रधानमन्त्री केपी शर्मा ओलीले आगामी ११ औँ राष्ट्रिय महाधिवेशनको पूर्वसन्ध्यामा बिहीबार देशभरका सम्पादकसँग छलफल गर्दैछन् ।
प्रेस चौतारी नेपालले आयोजना गरेको ‘अध्यक्षसँग संवाद’ कार्यक्रमका लागि सम्पादकहरूलाई निमन्त्रणा पठाएको हो । उक्त कार्यक्रम बिहीबार दिउँसो १ बजे कोटेश्वरस्थित होटल ‘ए-भा भेन्यु’मा सुरु हुने जनाएको छ ।
शनिबारदेखि प्रारम्भ हुने एमालेको ११ औँ महाधिवेशन लक्षित यो भेटघाटमा अध्यक्ष ओलीले आफ्नो आगामी राजनीतिक कार्ययोजना, नेतृत्वबारेको धारणा तथा पार्टीको आगामी रणनीतिसम्बन्धी विचार सम्पादकसामु प्रस्तुत गर्ने तयारी गरेको बताइएको छ ।
अर्को कार्यकालका लागि अध्यक्ष पदमा उम्मेदवार बन्ने तयारीमा रहेका ओलीले महाधिवेशनको दिशा, संगठन सुदृढीकरण तथा राष्ट्रिय राजनीतिमा एमालेको भूमिकाबारे आफ्नो दृष्टिकोण खुलाउने अपेक्षा गरिएको छ ।
एमालेको ११ औँ राष्ट्रिय महाधिवेशनको उद्घाटन समारोह मंसिर २७ गते भक्तपुरको तीनकुने मैदानमा हुनेछ । त्यसपछि काठमाडौंको भृकुटीमण्डपमा सञ्चालन हुने बन्दसत्रमार्फत पार्टीले आगामी पाँच वर्षका लागि नयाँ नेतृत्व चयन गर्नेछ ।
प्रतिक्रिया