बुटवल । रुपन्देही उद्योग संघको आयोजनामा ‘समृद्ध नेपाल निर्माणको आधार, स्वदेशी उद्यमशीलताको विस्तार’ भन्ने मूल नाराका साथ १६ औँ राष्ट्रिय औद्योगिक प्रदर्शनी कृषि, प्रविधि तथा पर्यटन महोत्सव-२०८२ आज बिहीबारदेखि बुटवलमा सुरु हुँदैछ ।
बुटवल मण्डपस्थित निर्माणाधीन अन्तर्राष्ट्रिय प्रदर्शनी केन्द्रमा पहिलो पटक आयोजना हुन लागेको यो प्रदर्शनीको उद्घाटन दिउँसो २ः१६ बजे अर्थमन्त्री डा। रामेश्वर खनालले गर्ने कार्यक्रम रहेको छ । प्रदर्शनी उद्घाटनका लागि आवश्यक सम्पूर्ण तयारी पूरा भइसकेको रुपन्देही उद्योग संघका अध्यक्ष कृष्णप्रसाद पराजुलीले जानकारी दिए ।
प्रदर्शनीमा कृषि, उद्योग, प्रविधि, पर्यटन तथा सेवा क्षेत्रसँग सम्बन्धित विभिन्न प्रकृतिका करिब ५ सय स्टल रहनेछन् । स्वदेशी उत्पादनको प्रवर्द्धन, घरेलु तथा साना उद्योगलाई बजारसँग जोड्ने, उद्यमशीलता विकास गर्ने र लगानीका सम्भावना पहिचान गर्ने उद्देश्यले प्रदर्शनी आयोजना गरिएको संघले जनाएको छ ।
महोत्सवमा स्वदेशी उत्पादनको प्रदर्शनी तथा बिक्रीसँगै आधुनिक कृषि प्रविधि, मेसिनरी, सूचना प्रविधि, पर्यटन प्रवर्द्धनका सामग्री, हस्तकला तथा स्थानीय उत्पादनहरू अवलोकन गर्न सकिनेछ । साथै, उद्यमी, व्यवसायी, कृषक, विद्यार्थी तथा आम सर्वसाधारणका लागि लक्षित विभिन्न अन्तरक्रिया, प्रस्तुति र मनोरञ्जनात्मक कार्यक्रमहरू पनि समावेश गरिने आयोजकले जनाएको छ ।
रुपन्देही उद्योग संघले यो प्रदर्शनीले स्थानीय तथा राष्ट्रिय उद्योगको प्रवर्द्धनमा टेवा पुग्ने, रोजगारी सिर्जना हुने र स्वदेशी उत्पादनप्रति उपभोक्ताको आकर्षण बढ्ने विश्वास लिएको छ । प्रदर्शनीले लुम्बिनी प्रदेशलाई औद्योगिक, कृषि र पर्यटनको केन्द्रका रूपमा स्थापित गर्न महत्वपूर्ण भूमिका खेल्ने अपेक्षा गरिएको छ ।
प्रतिक्रिया