यू-१९ एसिया कपको फाइनलमा आज भारत-पाकिस्तान भिडन्त

काठमाडौं । दुवईमा जारी यू-१९ एसिया कप क्रिकेट प्रतियोगिताको फाइनलमा आज भारत र पाकिस्तान आमनेसामने हुँदैछन् । प्रतिस्पर्धा आइतबार बिहान १०:४५ बजे दुवईस्थित आईसीसी क्रिकेट मैदानमा सुरु हुनेछ ।

पहिलो सेमिफाइनलमा भारतले श्रीलंकालाई आठ विकेटले पराजित गर्दै फाइनलमा स्थान सुरक्षित गरेको हो । त्यसैगरी दोस्रो सेमिफाइनलमा पाकिस्तानले बंगलादेशलाई समान आठ विकेटले हराउँदै उपाधि भिडन्तमा भारतसँग भेट पक्का गरेको छ ।

आठ टोली सहभागी प्रतियोगितामा समूह चरणबाटै यूएई, अफगानिस्तान, नेपाल र मलेसिया प्रतियोगिताबाट बाहिरिएका थिए । फाइनलमा पारम्परिक प्रतिद्वन्द्वी भारत र पाकिस्तानबीच हुने भिडन्तले प्रतियोगितालाई थप रोमाञ्चक बनाउने अपेक्षा गरिएको छ ।