काठमाडौं । जनपक्षीय विद्यार्थी युनियन, नेपालले शैक्षिक हड्तालको घोषणा गरेपछि काठमाडौं उपत्यकाका अधिकांश विद्यालय आज बन्द भएका छन् । हड्तालको प्रभावस्वरूप उपत्यकाभरका विद्यालयहरूले विद्यार्थी तथा अभिभावकलाई सूचना पठाउँदै आज विद्यालय बन्द रहने जानकारी गराएका छन् ।
नेकपा जनपक्ष पार्टी निकट विद्यार्थी संगठन जनपक्षीय विद्यार्थी युनियन, नेपालले १८ बुँदे माग अघि सार्दै शैक्षिक हड्ताल आह्वान गरेको हो । युनियनले निजी विद्यालयहरूले लिँदै आएको शूल्कमा ५० प्रतिशत कटौती गर्नुपर्ने, माध्यमिक तहसम्म निःशुल्क शिक्षा पूर्ण रूपमा लागू गर्नुपर्ने माग राखेको छ ।
युनियनकी अध्यक्ष सुनिता बुढाथोकीले विदेशमा रहेका नेपाली विद्यार्थीले पनि आगामी निर्वाचनमै मतदान गर्न पाउनुपर्ने माग रहेको बताइन् । “हाम्रा मागमा प्याब्सन र एनप्याब्सनले समेत सहमति जनाउँदै विद्यालय बन्द गरिएको हो,” उनले दाबी गरिन् ।
युनियनले सरकारी विद्यालयमा अंग्रेजी र राष्ट्रिय भाषामा अध्ययन-अध्यापन गराउनुपर्ने, कक्षा १२ सम्म अध्ययनरत विद्यार्थीलाई मासिक ५०० रुपैयाँ विद्यार्थी भत्ता उपलब्ध गराउनुपर्ने माग पनि अघि सारेको छ ।
त्यसैगरी, कलेज तहमा अध्ययन गर्न चाहने सबै विद्यार्थीलाई अध्ययनसँगै स्वरोजगार हुने वातावरण सिर्जना गर्न सरकार जमानी बसेर न्यूनतम १० लाख रुपैयाँसम्मको सहुलियतपूर्ण ऋण उपलब्ध गराउनुपर्ने मागसहित शैक्षिक हड्ताल गरिएको युनियनले जनाएको छ ।
प्रतिक्रिया