काठमाडौं । काठमाडौं महानगरपालिकाका मेयर बालेन्द्र शाह (बालेन) ले पूर्वप्रधानमन्त्री डा. बाबुराम भट्टराईसँग भेट गरी आफू राजनीतिमा सक्रिय भएको जानकारी दिएका छन् । बिहीबार कुपन्डोलस्थित सल्लाहकार कुमार व्यञ्जनकारको घरमा भएको भेटवार्तामा बालेनले भट्टराईलाई बोलाएका थिए ।
भेटपछि भट्टराईले सञ्चारकर्मीहरूसँग भने, “नयाँ र वैकल्पिक शक्ति मिलेर अगाडि बढ्नुपर्छ भन्ने पक्षमा म छु । यही विषयमा बालेनजीले फोन गरेपछि म भेट्न आएको हुँ ।”
बालेनले उक्त भेटमा आफू राजनीतिमा प्रवेश गरेको बताएर भट्टराईसँग सहयोग मागेका थिए । जेनजी स्रोतका अनुसार बालेनले भट्टराईलाई अभिभावकको भूमिकामा रहँदै आफूलाई मार्गदर्शन र सहयोग गरिदिन अनुरोध गरेका थिए ।
यो भेटवार्ता राजनीतिक परिवेशमा नयाँ चर्चा सिर्जना गरेको छ । विशेष गरी बालेनले आफ्नो राजनीतिक सक्रियता सार्वजनिक गर्दै अनुभवी नेता भट्टराईसँग सल्लाह लिन खोज्नु आगामी चुनावी तयारी वा वैकल्पिक राजनीतिक भूमिका लिन लागिएको संकेतका रूपमा हेरिएको छ ।
भेटवार्तापछि बालेन र भट्टराईबीच आगामी रणनीति वा सहकार्यबारे थप छलफल हुने अनुमान गरिएको छ । राजनीतिक विश्लेषकहरूका अनुसार बालेनको सक्रियता र भट्टराईको मार्गदर्शनले काठमाडौं तथा राष्ट्रिय स्तरमा नयाँ राजनीतिक खालको हलचल ल्याउन सक्ने सम्भावना छ ।
प्रतिक्रिया