काठमाडौं । राष्ट्रिय स्वतन्त्र पार्टी (रास्वपा)ले आगामी फागुन २१ गते हुने प्रतिनिधिसभा सदस्य निर्वाचनका लागि समानुपातिकतर्फ चार जना कलाकारलाई उम्मेदवार बनाएको छ । पार्टीले कला, संस्कृति र सामाजिक क्षेत्रमा सक्रिय व्यक्तिहरूलाई राजनीतिक मूलधारमा ल्याउने उद्देश्यसहित कलाकारहरूलाई उम्मेदवार बनाएको जनाएको छ ।
रास्वपाले गायक तथा अभिनेता प्रकाश सपूत, अभिनेता तथा रियालिटी शो प्रस्तोता आशिफ शाह, गायिका तथा रियालिटी शो प्रस्तोता रिमा विश्वकर्मा र गायिका सत्यकला राईलाई समानुपातिक बन्दसूचीमा समेटेको हो ।
पार्टीले सार्वजनिक गरेको विवरणअनुसार आशिफ शाह मुस्लिम समुदायबाट, सत्यकला राई जनजाति कोटाबाट तथा प्रकाश सपूत र रिमा विश्वकर्मा दलित क्लस्टरबाट समानुपातिक उम्मेदवारका रूपमा सूचीकृत छन् । रिमा विश्वकर्मा यसअघि उज्यालो नेपाल पार्टीको केन्द्रीय सदस्यसमेत रहेकी छन् ।
रास्वपाले सांस्कृतिक, सामाजिक तथा सिर्जनात्मक क्षेत्रमा योगदान पुर्याएका व्यक्तिलाई राजनीतिमा ल्याएर समावेशी प्रतिनिधित्व सुनिश्चित गर्ने उद्देश्य राखेको बताउँदै आएको छ । कलाकारहरूलाई उम्मेदवार बनाउनु पार्टीको ‘नयाँ सोच, नयाँ अनुहार’ भन्ने नारासँग मेल खाने कदमका रूपमा हेरिएको छ ।
यसअघि पनि रास्वपाले विभिन्न पेसा र क्षेत्रबाट प्रतिनिधित्व हुने गरी उम्मेदवार चयन गर्दै आएको छ । पार्टीको यो निर्णयले राजनीतिमा कला र संस्कृतिको भूमिकालाई थप स्थापित गर्ने विश्वास गरिएको छ ।
प्रतिक्रिया