बुटवल । जिल्ला ट्राफिक प्रहरी कार्यालय रुपन्देहीको नेतृत्वमा बुटवल-भैरहवा सडकखण्डमा सवारी चालक लक्षित मादक पदार्थ सेवन (मापसे) तथा लागूऔषध सेवन (लापसे) सम्बन्धी सघन चेकजाँच अभियान सञ्चालन गरिएको छ ।
शुक्रबार तिलोत्तमा नगरपालिका-२ स्थित शंकरनगरचोक क्षेत्रमा सञ्चालन गरिएको उक्त चेकजाँच कार्यक्रममा जिल्ला ट्राफिक प्रहरी कार्यालयबाट खटिएका प्रहरी निरीक्षक रुद्रकुमार गिरीको नेतृत्वमा ११ जनाको ट्राफिक प्रहरी टोली सक्रिय रहेको थियो । अभियानमा पश्चिम नेपाल बस व्यवसायी प्रालिका पदाधिकारीहरूको समेत सहभागिता रहेको थियो ।
बुटवल-सुनौली सडकखण्डमा सञ्चालनमा रहेका बस तथा माइक्रोबसका चालक र सहचालकलाई लक्षित गरी मापसे तथा लापसे परीक्षण गरिएको थियो । चेकजाँचका क्रममा सवारी चालकहरूलाई ट्राफिक नियमको पालना, सुरक्षित सवारी सञ्चालन, यात्रुको सुरक्षाप्रति जिम्मेवार बन्ने विषयमा सचेतना समेत गराइएको ट्राफिक प्रहरीले जनाएको छ ।
प्रहरीका अनुसार पछिल्लो समय सवारी दुर्घटनाको प्रमुख कारणमध्ये मापसे र लापसे एक भएकाले यस्तो अभियानलाई निरन्तरता दिइनेछ । यात्रुहरूको सुरक्षालाई मध्यनजर गर्दै नियमित रूपमा अनुगमन, परीक्षण र सचेतनामूलक कार्यक्रम सञ्चालन गरिने पनि ट्राफिक प्रहरीको भनाइ छ ।
बस व्यवसायीहरूले समेत ट्राफिक प्रहरीको अभियानलाई सहयोग गर्दै चालकहरूलाई नियम पालना गर्न प्रेरित गर्ने प्रतिबद्धता जनाएका छन् । ट्राफिक प्रहरीका अनुसार आगामी दिनमा पनि राजमार्ग तथा सहरी क्षेत्रमा यस्ता चेकजाँच अभियानलाई थप कडाइका साथ निरन्तरता दिइनेछ ।
प्रतिक्रिया