काठमाडौं । नेपाली कांग्रेस विभाजनको संघारमा पुगेको जस्तो देखिएको संकटपूर्ण अवस्थामा नेकपा एमालेका नेता प्रदीप ज्ञवालीले कांग्रेस नेतृत्वलाई विभाजनबाट जोगिन आग्रह गरेका छन् ।
सामाजिक सञ्जाल फेसबुकमार्फत उनले प्रमुख दलहरूको आन्तरिक अवस्था कमजोर हुँदा त्यसको प्रत्यक्ष असर मुलुकको लोकतान्त्रिक प्रणालीमै पर्ने चेतावनी दिँदै उनले विभाजन हुन नहुने बताएका हुन् ।
ज्ञवालीले विगतका अनुभव स्मरण गराउँदै २०५४ मा भएको तत्कालीन नेकपा (एमाले) को विभाजनले कसरी हिंसात्मक द्वन्द्वलाई राष्ट्रव्यापी रूपमा फैलिन सघायो भन्ने उदाहरण प्रस्तुत गरेका छन् । साथै, २०५९ मा नेपाली कांग्रेस विभाजन भएपछि त्यसले राजालाई प्रजातन्त्र अपहरण गर्ने बहाना दिएको यथार्थ पनि उनले उल्लेख गरेका छन् ।
उनका अनुसार दलहरू आन्तरिक रूपमा कमजोर वा विभाजित हुँदा त्यसको मूल्य अन्ततः देशको लोकतन्त्रले नै चुकाउनुपर्छ । त्यसैले लोकतन्त्रको सुस्वास्थ्यका लागि राजनीतिक दलहरूको आन्तरिक स्वास्थ्य सबल हुनु अनिवार्य पूर्वशर्त भएको उनले बताएका छन् ।
ज्ञवालीले लोकतन्त्र, संविधान र राष्ट्रिय हितमाथि गम्भीर चुनौती देखिएको वर्तमान सन्दर्भमा नेपाली कांग्रेसले आफ्नो काँधमा रहेको ऐतिहासिक जिम्मेवारी बोध गर्दै आन्तरिक समस्याहरूलाई समझदारी र सुझबुझका साथ समाधान गर्ने विश्वास व्यक्त गरेका छन् ।
प्रतिक्रिया