सुकेधारामा संस्थापन इतर कांग्रेसको शक्ति प्रदर्शन, देउवा सहभागी

काठमाडौं । नेपाली कांग्रेसको संस्थापनइतर पक्षले आयोजना गरेको राष्ट्रिय भेला काठमाडौंको सुकेधारास्थित मिराकल पार्टी भेन्युमा जारी छ।

भेलामा कांग्रेसका निवर्तमान सभापति तथा पूर्वप्रधानमन्त्री शेरबहादुर देउवा पनि सहभागी भएका छन्। भेला सुरु भएको केही समयपछि पुगेका देउवा कार्यक्रममा प्रमुख अतिथिका रूपमा सहभागी भएका हुन्।

राष्ट्रिय भेला आयोजक समिति संयोजक शशांक कोइराला, निवर्तमान कार्यवाहक सभापति पूर्णबहादुर खड्का, नेताहरू विमलेन्द्र निधि, विजयकुमार गच्छदार, प्रकाशमान सिंह, कृष्णप्रसाद सिटौला, शेखर कोइराला, प्रकाशशरण महत, उमाकान्त चौधरी, रमेश लेखक, मोहनबहादुर बस्नेत, ईश्वरी न्यौपाने, जितजंग बस्नेत, रामहरि खतिवडा र मीनबहादुर विश्वकर्मालगायतका नेताहरू भेलामा उपस्थित छन्।

भेलामा गाउँ तथा नगर सभापति, प्रदेश तथा प्रतिनिधिसभा क्षेत्रीय सभापति, महाधिवेशन प्रतिनिधि, महासमिति सदस्य, जिल्ला सभापति, प्रदेश सभापति, निवर्तमान पदाधिकारी तथा केन्द्रीय सदस्यहरूका साथै पूर्वसांसद र पूर्वमन्त्रीहरूलाई समेत बोलाइएको छ।

सर्वोच्च अदालतले नेपाली कांग्रेसको आधिकारिकता विवादसम्बन्धी मुद्दा पुनरावलोकन गर्न अनुमति दिएपछि संस्थापनइतर समूहले काठमाडौंमा राष्ट्रिय भेला आयोजना गरेको हो। भेलालाई पार्टीभित्रको पछिल्लो राजनीतिक परिस्थिति, संगठनात्मक अवस्था र आगामी रणनीतिबारे छलफल तथा शक्ति प्रदर्शनका रूपमा हेरिएको छ।

भेलामा सहभागी नेताहरूले पार्टीको आन्तरिक एकता, संगठन सुदृढीकरण तथा पछिल्लो राजनीतिक परिस्थितिबारे धारणा राख्ने तयारी गरेका छन्।