रोल्पा । रोल्पामा भएको बोलेरो जीप दुर्घटनामा दुई जना विद्यार्थीको ज्यान गएको छ भने नौ जना घाइते भएका छन्।
सुनछहरी गाउँपालिका–४ स्युरी निवासी १२ वर्षीया दीपा पुन र सोही उमेरका सुनिल विकको मृत्यु भएको प्रहरीले जनाएको छ । राष्ट्रपति रनिङ सिल्ड प्रतियोगितामा सहभागी भएर घर फर्किंदै गर्दा उनीहरु दुर्घटनामा परेका थिए । गम्भीर घाइते भएका दुई जनालाई प्राथमिक स्वास्थ्य केन्द्र सुलिचौर पुर्याइए पनि चिकित्सकले राति साढे १२ बजे मृत घोषणा गरेका थिए।
सुनछहरी गाउँपालिका–१ गामखोलाको सेरमबाट विद्यार्थी बोकेर वडा नम्बर ४ स्युरीतर्फ जाँदै गरेको ग १ ज ६६६६ नम्बरको बोलेरो जीप गएराति करिब १० बजे अनियन्त्रित भई सडकबाट तल पल्टिएको थियो ।
दुर्घटनामा परी सुनछहरी गाउँपालिका–४ स्युरीका १२ वर्षीया अमृता पुन, १२ वर्षीया विपना घर्ती मगर, १५ वर्षीय किसन घर्ती मगर र १५ वर्षीया हस्तिरा विक, १५ वर्षीय हिमाल विक, १४ वर्षीया जमुना विक, १६ वर्षीया पवित्रा पुन, २४ वर्षीया अस्मिता विक, १७ वर्षीय शनि विक घाइते भएका छन्। घाइते सबैलाई बुटवल रिफर गरिएको प्रहरीले जनाएको छ।
प्रतिक्रिया