विशेष महाधिवेशनको बन्दसत्र आज, बिहान १० बजेदेखि सुरु हुने

काठमाडौं । नेपाली कांग्रेसको दोस्रो विशेष महाधिवेशन अन्तर्गत बन्दसत्र सोमबार बिहान १० बजेदेखि सुरु हुने भएको छ । यसअघि बिहान ८ बजेदेखि बन्दसत्र हुने भनिए पनि महाधिवेशन प्रतिनिधिहरूको दर्ता प्रक्रिया बाँकी रहेको र खाजाको समय छुट्ट्याउनुपर्ने भएकाले कार्यक्रम दुई घण्टा ढिला गरी सुरु गर्न लागिएको हो ।

महाधिवेशन व्यवस्थापन उपसमिति अन्तर्गत प्रचारप्रसार संयोजक सुवास पोखरेलका अनुसार सोमबार बिहान ८ बजेदेखि प्रतिनिधिहरूको दर्ता र खाजाको व्यवस्था गरिनेछ भने बिहान १० बजेदेखि औपचारिक रूपमा बन्दसत्र सञ्चालन हुनेछ ।

विशेष महाधिवेशनमा सहभागी हुने प्रतिनिधिहरूको संख्या हालसम्म २ हजार ६६२ पुगेको छ, जुन कूल महाधिवेशन प्रतिनिधिको ५६ दशमलव १२ प्रतिशत हो । असोज महिनामा विशेष महाधिवेशनको माग गर्दा ५४ प्रतिशत प्रतिनिधिहरूको हस्ताक्षर संकलन गरिएको थियो ।

आइतबार उद्घाटन सत्र सम्पन्न भएसँगै दर्ता प्रक्रिया बन्द गरिएको थियो । उद्घाटन सत्रपछि रात्रिभोजको कार्यक्रम भएकाले आइतबारका लागि दर्ता रोकिएको व्यवस्थापन समितिले जनाएको छ । तर, उद्घाटन सत्रका कारण धेरै प्रतिनिधिहरूले दर्ता गर्न नपाएकाले सोमबार बिहान पुनः दर्ता प्रक्रिया निरन्तरता दिइने पोखरेलले जानकारी दिए ।

बन्दसत्रमा पार्टीको वर्तमान अवस्था, संगठनात्मक संरचना, नेतृत्व र आगामी राजनीतिक कार्यदिशाबारे गम्भीर छलफल हुने अपेक्षा गरिएको छ ।