काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले नेपालको राष्ट्रिय एकताको सबल आधार विविधता नै भएको बताएका छन् ।
२८६२औँ सोनाम ल्होछारको अवसरमा शुभकामना सन्देश जारी गर्दै उनले सोनाम ल्होछारलाई नयाँ वर्षको उत्सव मात्र नभई पहिचान, संस्कृति, श्रम, प्रकृति र सामूहिक जीवनप्रतिको सम्मानको प्रतीकका रूपमा व्याख्या गरेका छन् । डुक ल्हो (सर्प वर्ष)लाई विदाइ गरी ता ल्हो (घोडा वर्ष)को स्वागत गर्ने यो पर्वले परिवर्तन, गति र नयाँ संकल्पको सन्देश दिने उनले उल्लेख गरेका छन् ।
तामाङ समुदायको ल्हो परम्परा, सेलो संस्कृति, डम्फु–टुङ्नाको धुन तथा सामूहिक उत्सवले नेपालको बहुजातीय र बहुसांस्कृतिक चरित्रलाई जीवन्त बनाउँदै आएको प्रचण्डको भनाइ छ । उनले यही विविधता नै नेपालको राष्ट्रिय एकताको बलियो आधार भएको स्पष्ट पारेका छन् ।
समाजमा अझै पनि सामाजिक न्याय, समानता, समावेशिता र उत्पीडित समुदायका अधिकारका लागि संघर्ष जारी रहेको उल्लेख गर्दै उनले सोनाम ल्होछारले सबैलाई विभेदविरुद्ध एकताबद्ध भई सुशासन, समृद्धि र जनताको शासन स्थापना गर्ने अभियानमा थप दृढ बनाओस् भन्ने कामना गरेका छन् ।
प्रतिक्रिया