नवलपुर । नवलपुर प्रतिनिधि सभा निर्वाचन क्षेत्र नम्बर १ मा देखिएको नेपाली कांग्रेसभित्रको आन्तरिक किचलो अन्ततः टुंगिएको छ। प्रतिनिधि सभा निर्वाचन ऐनअनुसार नेपाली कांग्रेस नवलपुर निर्वाचन क्षेत्र नम्बर १ को आधिकारिक उम्मेदवारका रूपमा बालकृष्ण घिमिरेलाई कायम गरिएको छ।
मुख्य निर्वाचन कार्यालयका सहायक निर्वाचन अधिकृत प्रेम प्रसाद पौडेलले आवश्यक सबै कानुनी प्रक्रिया पूरा गरी बालकृष्ण घिमिरेलाई नेपाली कांग्रेसको आधिकारिक उम्मेदवारका रूपमा मान्यता दिइएको जानकारी दिए। उनका अनुसार एउटै पार्टीबाट दुई जनाको उम्मेदवारी परेपछि निर्वाचन कानुन, विधि र विधानको अध्ययन गरी आधिकारिक उम्मेदवार टुंगो लगाइएको हो।
चार पटक लगातार निर्वाचन जित्दै आएका डा. शंकर कोइरालाले नवलपुर–१ छाडेपछि उक्त क्षेत्रमा कांग्रेसभित्र उम्मेदवारीका विषयमा विवाद उत्पन्न भएको थियो। उम्मेदवारी दर्ताको अन्तिम दिन नेपाली कांग्रेसका जिल्ला उपसभापति बालकृष्ण घिमिरे र महासमिति सदस्य गजेन्द्र आलेमगरले पार्टी सभापति गगन थापाको आधिकारिक हस्ताक्षर सहितको टिकट पेश गर्दै उम्मेदवारी दर्ता गराएका थिए। यसले पार्टीभित्र हलचल मच्चिएको थियो।
उम्मेदवारी दर्तापछि कांग्रेस नवलपुरको जिल्ला नेतृत्व निरन्तर छलफलमा जुटेको थियो। एक जना उम्मेदवारलाई उम्मेदवारी फिर्ता लिन आग्रह गरिए पनि दुवै उम्मेदवार तत्काल फिर्ता लिन तयार नभएपछि विषय निर्वाचन कार्यालयसम्म पुगेको थियो।
मुख्य निर्वाचन कार्यालयले प्रतिनिधि सभा निर्वाचन ऐन र प्रचलित कानुनअनुसार प्रक्रिया अघि बढाउँदै अन्ततः बालकृष्ण घिमिरेलाई आधिकारिक उम्मेदवार कायम गरेको हो
प्रतिक्रिया