वरिष्ठ कलाकार सुनिल थापाको हृदयघातका कारण निधन

काठमाडौं । वरिष्ठ कलाकार सुनिल थापाको निधन भएको छ । स्वास्थ्यमा अचानक समस्या देखिएपछि थापाथलीस्थित नर्भिक अस्पतालमा भर्ना गरिएका थापाको आज बिहान उपचारकै क्रममा निधन भएको हो ।

कलाकार संघका अध्यक्ष मोहन निरौलाका अनुसार हृदयघातका कारण ६० वर्षको थापाको निधन भएको हो ।

नेपाली चलचित्रमा विशेषगरी खलनायक भूमिकामा सशक्त अभिनयमार्फत चिनिनु भएका थापा ‘राते काइँला’ नामले अत्यन्त लोकप्रिय थिए । उनको अभिनयले नेपाली चलचित्रमा खलनायक पात्रलाई नयाँ उचाइ दिएको मानिन्छ ।

लामो समयदेखि नेपाली तथा भारतीय चलचित्र उद्योगमा सक्रिय रहेका थापा पछिल्लो समय काठमाडौंको शंखमूलस्थित अपार्टमेन्टमा बस्दै आएका थिए ।

उनको निधनले नेपाली चलचित्र क्षेत्रले एक अनुभवी, प्रभावशाली र समर्पित कलाकार गुमाएको भन्दै कलाकार, चलचित्रकर्मी तथा शुभेच्छुकहरूले गहिरो शोक व्यक्त गरेका छन् ।