काठमाडौं । आईसीसी टी-२० विश्वकपअन्तर्गत दोस्रो खेलमा वेस्ट इण्डिजले स्कटल्याण्डलाई ३५ रनले पराजित गरेको छ । भारतको कोलकातास्थित इडेन गार्डेन्समा भएको खेलमा वेस्ट इण्डिजले प्रस्तुत गरेको लक्ष्य पछ्याउन नसक्दा स्कटल्याण्ड पराजित भएको हो ।
पहिले ब्याटिङ गरेको वेस्ट इण्डिजले निर्धारित २० ओभरमा ५ विकेट गुमाउँदै १ सय ८२ रनको प्रतिस्पर्धात्मक योगफल तयार पारेको थियो । वेस्ट इण्डिजका शिमरन हेटमायरले ३६ बलमा ६४ रनको विस्फोटक पारी खेले । उनले दुई चौका र छ छक्का प्रहार गर्दै टोलीको इनिङ्स मजबुत बनाए ।
त्यसैगरी, ब्रान्डन किङले ३० बलमा ३५ रन जोडे । शेरफेन रुथफोर्डले १३ बलमा २६ रन बनाउँदा कप्तान रोभमन पावेलले १४ बलमा २४ रनको योगदान दिए ।
बलिङतर्फ स्कटल्याण्डका ब्राड कुरीले दुई विकेट लिए भने माइकल लिस्क, ओलिभर डेभिडसन र सफयान शरिफले समान एक-एक विकेट लिए ।
१८३ रनको लक्ष्य पछ्याउँदै जवाफी ब्याटिङमा उत्रिएको स्कटल्याण्ड १९ औँ ओभरमा नै १ सय ४७ रनमा अलआउट भयो । स्कटल्याण्डका कप्तान रिची बेरिङटनले २४ बलमा ४२ रनको सर्वाधिक पारी खेले पनि टोलीलाई जिततर्फ डो¥याउन सकेनन् । उनले तीन चौका र दुई छक्का प्रहार गरे ।
त्यस्तै, टम ब्रुसले २८ बलमा ३५ रन बनाए भने जर्ज मुन्सेले १९ रनको योगदान दिए । अन्य ब्याट्सम्यानहरू वेस्ट इण्डिजको बलिङ आक्रमणसामु टिक्न सकेनन् ।
बलिङतर्फ वेस्ट इण्डिजका रोमारियो शेफर्डले उत्कृष्ट प्रदर्शन गर्दै एक्लैले ५ विकेट लिए । जेसन होल्डरले तीन विकेट झार्दा गुडकेश मोती र शमार जोसेफले समान एक-एक विकेट लिए ।
शेफर्डको घातक बलिङ र हेटमायरको आक्रामक ब्याटिङको बलमा वेस्ट इण्डिजले प्रतियोगितामा महत्वपूर्ण जित हात पार्न सफल भयो ।
प्रतिक्रिया