काठमाडौं । आइसीसी टी-२० विश्वकप २०२६ मा भारतले विजयी सुरुवात गरेको छ । शनिबार राति सम्पन्न खेलमा भारतले अमेरिकालाई २९ रनले पराजित गर्दै प्रतियोगिताको पहिलो खेलमै महत्वपूर्ण जित निकालेको हो ।
वानखेडे क्रिकेट स्टेडियममा भएको खेलमा भारतले दिएको १६२ रनको लक्ष्य पछ्याउँदै जवाफी ब्याटिङमा उत्रिएको अमेरिका निर्धारित २० ओभरमा आठ विकेट गुमाउँदै १३२ रनमै सीमित भयो ।
अमेरिकाका लागि सुभम् रजाने र सञ्जय कृष्णमुर्तिले समान ३७-३७ रनको योगदान दिए । यस्तै, मिलिन्द कुमारले ३४ रन बनाए पनि टोलीलाई जित दिलाउन सकेनन् ।
बलिङतर्फ भारतका मोहम्मद सिराजले उत्कृष्ट प्रदर्शन गर्दै तीन विकेट लिए । अर्शदीप सिंह र अक्षर पटेलले समान दुई-दुई विकेट हात पारे ।
यसअघि टस हारेर पहिले ब्याटिङ गरेको भारतले निर्धारित २० ओभरमा नौ विकेट गुमाउँदै १६१ रन बनाएको थियो । भारतीय कप्तान सूर्यकुमार यादवले विस्फोटक ब्याटिङ गर्दै शानदार अर्धशतक प्रहार गरे । ४९ बलको सामना गरेका यादवले १० चौका र चार छक्काको मद्दतमा सर्वाधिक ८४ रन बनाए ।
इशान पाण्डेले २० रन, तिलक बर्माले २५ रन तथा अक्षर पटेलले १४ रन जोडे । अभिषेक शर्मा भने खाता नखोली आउट भए । अन्य ब्याटरहरूले उल्लेखनीय योगदान दिन सकेनन् ।
अमेरिकाका बलरमध्ये शाडली भ्यान शाल्कविक उत्कृष्ट देखिए । उनले चार ओभरमा २५ रन खर्चिएर चार विकेट लिए । हर्मित सिंहले दुई विकेट लिँदा अलि खान र मोहम्मद मसिनले समान एक-एक विकेट लिए ।
प्रतिक्रिया