काठमाडौँ । टी-२० क्रिकेट विश्वकपमा नेपाल वेस्ट इन्डिजसँग ९ विकेटले पराजित भएको छ ।आइतबार मुम्बइस्थित वानखेड स्टेडियममा नेपालले दिएको १३४ रनको लक्ष्य वेस्ट इन्डिजले १५.२ ओभरमा १ विकेटको क्षतिमा पूरा गरेसँगै नेपाल समूह चरणबाट बाहिरिएको छ ।
वेस्ट इन्डिजका लागि शाइ होपले ६१ रनको अर्धशतकीय पारी खेले । ४४ बल खेलेका उनले ५ चौका र ३ छक्का प्रहार गरे । त्यस्तै सिमरोन हेटमायरले ४६ रन बनाउँदा ब्रान्डन किङ्सले २२ रन जोडे । नेपालका लागि नन्दन यादवले एक विकेट लिँदा बाकी बलरले विकेट निकाल्न सकेनन् ।
यसअघि टस हारेर पहिले ब्याटिङ गरेको नेपालले निर्धारित २० ओभर ८ विकेट गुमाउँदै १३३ रन बनाएको थियो ।
नेपालका लागि दीपेन्द्र सिंह ऐरीले सर्वाधिक ५८ रनको अर्धशतकीय पारी खेलेका थिए । ४७ बल खेलेका उनले ३ चौका र ३ छक्का प्रहार गरे ।
नेपालका लागि सोमपाल कामीले २६ रनको योगदान गर्दा लोकेश बमले १३ रन मात्र जोड्न सफल भए ।
बलिङतर्फ वेस्ट इन्डिजका लागि जेशन होल्डरले सर्वाधिक चार विकेट लिए । त्यस्तै अकेल हुशेन, म्याथु फोड, समार जोसेप र रोस्टोन चेसले एक एक विकेट लिए ।
आजको खेलमा जित निकाल्दै वेस्ट इन्डिज सुपर आठमा प्रवेश गरेको छ । नेपाल रहेको समूह सीमा वेस्ट इन्डिज तीन खेलमा ६ अंक जोड्दै शीर्ष स्थानमा छ ।
दोस्रो स्थानमा रहेको इङ्ल्यान्डको पनि तीन खेलबाट चार अंक छ । समान दुई अंक रहेका नेपाल र स्कटल्यान्डले मंगलबार प्रतिस्पर्धा गर्दैछन् । स्कटल्यान्डलाई यो खेलले केही फरक परेपनि नेपालका लागि जित निकालेमा सुखद बिदाइ मात्र हुनेछ ।
प्रतिक्रिया