काठमाडौं । आईसीसी टी-२० विश्वकप अन्तर्गत समूह चरणको महत्वपूर्ण खेलमा श्रीलंकाले अस्ट्रेलियालाई ८ विकेटले पराजित गर्दै सुपर आठ चरणमा स्थान सुरक्षित गरेको छ । सोमबार राति सम्पन्न खेलमा अस्ट्रेलियाले पहिले ब्याटिङ गर्दै निर्धारित लक्ष्य १८२ रन प्रस्तुत गरेको थियो ।
उक्त लक्ष्य श्रीलंकाले उत्कृष्ट प्रदर्शन गर्दै मात्र दुई विकेटको क्षतिमा १२ बल बाँकी रहँदै १८४ रन बनाएर सहज रूपमा पूरा गर्यो । लगातार तेस्रो जित निकाल्दै श्रीलंकाले समूह ‘बी’मा ६ अंक जोडेको छ । यस समूहमा दुई खेल खेलेको जिम्बाबेले ४ अंक बनाएको छ भने तीन खेल खेलेको अस्ट्रेलियाले मात्र २ अंक जोड्न सकेको छ ।
अब सुपर आठमा प्रवेशका लागि अस्ट्रेलियालाई अन्तिम खेल जित्नैपर्ने दबाब रहेको छ । साथै, अस्ट्रेलियाको सम्भावना कायम रहन जिम्बाबेले बाँकी दुई खेल ठूलो अन्तरले गुमाउनुपर्ने अवस्था देखिएको छ । हालको अवस्थामा समूह ‘बी’बाट जिम्बाबेको सम्भावना बलियो देखिएको छ ।
यसअघि नै समूह ‘ए’बाट भारत सुपर आठमा प्रवेश गरिसकेको छ । यस समूहबाट दोस्रो स्थानका लागि अमेरिका र पाकिस्तानबीच प्रतिस्पर्धा जारी छ । पाकिस्तानले नामिबियाविरुद्धको अन्तिम खेल जितेमा ६ अंकसहित सुपर आठमा प्रवेश गर्नेछ, अन्यथा अमेरिका अघि बढ्नेछ ।
त्यस्तै, समूह ‘सी’बाट वेस्ट इन्डिज र इंग्ल्यान्ड सुपर आठमा प्रवेश गरिसकेका छन् । समूह ‘डी’बाट दक्षिण अफ्रिकाले स्थान सुरक्षित गरिसकेको छ भने न्युजिल्यान्ड र अफगानिस्तान अझै सुपर आठ प्रवेशको दौडमा रहेका छन् ।
प्रतिक्रिया