काठमाडौं । आईसीसी टी-२० विश्वकप क्रिकेट अन्तर्गत सुपर-८ चरणको पहिलो खेल वर्षाका कारण अवरुद्ध भएपछि न्युजिल्याण्ड र पाकिस्तानले अंक बाँडेका छन् । निर्धारित समयअनुसार शनिबार साँझ श्रीलंकाको कोलम्बोमा सवा ७ बजे सुरु हुने तय भएको खेल वर्षाका कारण हुन नसकेपछि दुवै टोलीले एक-एक अंक प्राप्त गरेका हुन् ।
यसअघि समूह चरणमा उत्कृष्ट प्रदर्शन गर्दै पाकिस्तान समूह ‘ए’को उपविजेताका रूपमा सुपर-८ मा प्रवेश गरेको थियो । पाकिस्तानले समूह चरणका चार खेलमध्ये तीन खेलमा जित र एक खेलमा हार बेहोर्दै ६ अंक जोडेको थियो । त्यसैगरी, समूह ‘डी’बाट प्रतिस्पर्धा गरेको न्युजिल्याण्डले पनि तीन जित र एक हारसहित ६ अंक जोड्दै सुपर-८ चरणमा स्थान सुरक्षित गरेको हो ।
यस संस्करणको विश्वकपमा कुल २० राष्ट्र सहभागी छन् । प्रतियोगिताबाट आयोजक भारत र श्रीलंकासहित जिम्बावे, वेस्ट इन्डिज, दक्षिण अफ्रिका, पाकिस्तान, इंग्ल्यान्ड र न्युजिल्याण्ड सुपर-८ चरणमा पुगेका छन् ।
सुपर-८ चरणका टोलीहरूलाई दुई समूहमा विभाजन गरिएको छ । समूह ‘एक’मा भारत, दक्षिण अफ्रिका, वेस्ट इन्डिज र जिम्बावे रहेका छन् भने समूह ‘दुई’मा इंग्ल्यान्ड, न्युजिल्याण्ड, पाकिस्तान र श्रीलंका रहेका छन् ।
सुपर-८ अन्तर्गत आइतबार दुई महत्वपूर्ण खेल हुने तालिका छ । पहिलो खेलमा श्रीलंका र इंग्ल्यान्डबीच प्रतिस्पर्धा हुनेछ भने दोस्रो खेलमा साविक विजेता भारत र उपविजेता दक्षिण अफ्रिकाबीच प्रतिस्पर्धा हुनेछ, जसलाई प्रतियोगिताको महत्वपूर्ण खेलका रूपमा हेरिएको छ ।
टी-२० विश्वकप २०२६ को फाइनल खेल फागुन २४ गते हुने तय गरिएको छ । यसैबीच, नेपाल भने समूह चरणबाटै बाहिरिएर प्रतियोगिताबाट बाहिरिएको छ ।
प्रतिक्रिया