काठमाडौं । केपी शर्मा ओलीले धादिङमा गएराति भएको बस दुर्घटनामा ठूलो मानवीय क्षति भएकोप्रति गहिरो दुःख व्यक्त गरेका छन् ।
नेपाल कम्युनिस्ट पार्टी (एमाले)का अध्यक्षसमेत रहेका ओलीले सामाजिक सञ्जाल फेसबुक मार्फत शोक सन्देश जारी गर्दै दुर्घटनामा ज्यान गुमाउनेप्रति श्रद्धाञ्जली अर्पण गरेका छन् । साथै उनले मृतकका परिवारजनप्रति हार्दिक समवेदना प्रकट गरेका छन् ।
अध्यक्ष ओलीले दुर्घटनामा घाइते भएका यात्रुहरूको शीघ्र स्वास्थ्य लाभको कामना गर्दै उपचारमा संलग्न निकायलाई प्रभावकारी सेवा उपलब्ध गराउन आग्रहसमेत गरेका छन् ।
पोखराबाट काठमाडौंतर्फ आउँदै गरेको यात्रुवाहक बस पृथ्वी राजमार्गअन्तर्गत धादिङको भैँसीगौंडा क्षेत्रमा दुर्घटना हुँदा १८ जनाको मृत्यु भएको छ भने २६ जना यात्रु घाइते भएका छन् ।
दुर्घटनापछि सुरक्षाकर्मीले तत्काल उद्धार कार्य सञ्चालन गरी घाइतेलाई नजिकका स्वास्थ्य संस्थामा उपचारका लागि पठाएका छन् । घटनाबारे थप अनुसन्धान भइरहेको प्रहरीले जनाएको छ ।
प्रतिक्रिया