काठमाडौं । आईसीसी टी-२० विश्वकपको सुपर ८ चरणअन्तर्गत भएको खेलमा वेस्ट इन्डिजले जिम्बाब्वेलाई १०७ रनको फराकिलो अन्तरले पराजित गरेको छ । प्रभावशाली ब्याटिङ र सशक्त बलिङ प्रदर्शनका कारण वेस्ट इन्डिजले प्रतियोगितामा आफ्नो दाबेदारी थप बलियो बनाएको छ ।
२५५ रनको विशाल लक्ष्य पछ्याएको जिम्बाब्वे १७.४ ओभरमा १४७ रनमै अलआउट भयो । जिम्बाब्वेका लागि ब्राड इभान्सले सर्वाधिक ४३ रन बनाए । आठौं नम्बरमा ब्याटिङ गर्न आएका उनले २० बलमा २ चौका र ५ छक्का प्रहार गर्दै आक्रामक इनिङ खेले । यस्तै डायन मायर्सले २८, सिकन्दर रजाले २७, तदिवानाशे मारुमानीले १५ र टोनी मुन्योंगाले १४ रन जोडे ।
वेस्ट इन्डिजका बलरहरूले उत्कृष्ट प्रदर्शन गरे । गुडाकेश मोतीले चार विकेट लिए भने अकिल होसेनले तीन विकेट हात पारे । म्याथ्यू फोर्डले दुई तथा जेसन होल्डरले एक विकेट लिए ।
यसअघि मुम्बईस्थित वानखेडे स्टेडियममा टस हारेर पहिले ब्याटिङ गरेको वेस्ट इन्डिजले निर्धारित २० ओभरमा ६ विकेट गुमाउँदै २५४ रन बनाएको थियो, जुन यस संस्करणको विश्वकपकै अहिलेसम्मको उच्च स्कोर हो । यसअघि श्रीलंकाले ओमानविरुद्ध २२५ रन बनाएको थियो ।
वेस्ट इन्डिजका लागि शिमरोन हेटमायरले ३४ बलमा ८५ रन बनाउँदै शानदार प्रदर्शन गरे । उनले ७ चौका र ७ छक्का प्रहार गरे । रोभम्यान पावेलले ३५ बलमा ५९ रन जोडे भने रोमारियो शेफर्डले १० बलमा २१ रन बनाए । कप्तान शाई होपले १४ रन बनाए भने शेर्फेन रदरफोर्ड ३१ रनमा अविजित रहे ।
जिम्बाब्वेका लागि रिचर्ड न्गाराभा र ब्लेसिङ मुजरबानीले समान दुई-दुई विकेट लिए ।
यस जितसँगै वेस्ट इन्डिजले सुपर ८ चरणमा नेट रनरेटसमेत सुधार गर्दै सेमिफाइनल यात्रालाई थप सहज बनाएको छ ।
प्रतिक्रिया