काठमाडौं । पछिल्लो तीन महिनाको अवधिमा ६१४ जना नेपाली नागरिकले नागरिकता त्यागेका छन् ।
गृह मन्त्रालयले हालै प्रकाशन गरेको दोस्रो प्रगतिविवरण अनुसार नेपालका बिभिन्न जिल्लाहरुबाट ६१४ जनाले नेपाली नागरिकता त्याग गरेका छन् । यस अवधिमा ५६ हजार १३४ जनाले आफ्नो नागरिकतामा रहेको डाटा सुधार वा विवरण संशोधन गरेका छन् । जस अन्तर्यत १८० जनाको नागरिकता रद्द भएको छ भने २४ जनाको बदर भएको छ । त्यसैगरि ६ जनाको पुनः नागरिकता कायम भएको छ ।
मन्त्रालयका अनुसार नागरिकता त्याग गर्नेहरुमा विदेशमा स्थायी रुपमा नै बसोबास गर्नेगरी विदेश गएका र विदेशको नागरिकता लिने प्रक्रियामा रहेकाहरु रहेका छन् ।
अमेरिका, क्यानडा, युरोप जस्ता देशहरूमा बस्न र त्यहाँको नागरिकतारसुविधा लिनका लागि आफ्नो देशको नागरिकता त्याग्नुपर्ने ब्यवस्था अनुसार नेपालीहरुले नागरिकता त्याग गरेको तथ्यांकले देखाएको छ । विदेशी नागरिकसँग विवाह गरी विदेशमा बस्नेहरूले पनि आफ्नो देशको नागरिकता त्याग्ने गर्छन् ।
नेपालको कानुनले दोहोरो नागरिकताको मान्यता नदिने भएकाले विदेशी नागरिकता लिने प्रक्रियामा नेपाली नागरिकता त्याग्नु अनिवार्य हुन्छ ।
तथ्यांकअनुसार तीन महिनाको अवधिमा कूल दुई लाख दुई हजार ९५६ वटा नागरिकता जारी भएको छ । वंशजको नागरिकता प्राप्त गर्नेको संख्या एक लाख १९ हजार १२ छ । २६ जनाले अंगीकृत नागरिकता लिएका छन् भने वैवाहिक अंगीकृत नागरिकता लिनेको संख्या तीन हजार ३४० रहेको छ ।
प्रतिक्रिया