तेहरान । इरानले आफ्ना सर्वोच्च नेता आयतोल्लाह अली खामेनीको हत्या भएको दाबीपछि कडा प्रतिक्रिया जनाउँदै दोषीमाथि बदला लिने चेतावनी दिएको छ ।
इरानी राष्ट्रपति मसुद पेजेस्कियानले खामेनीको हत्यालाई ‘भयानक अपराध’ को संज्ञा दिँदै यस घटनाले इस्लामिक जगत र शिया इतिहासमा गम्भीर प्रभाव पार्ने बताएका छन् ।
राष्ट्रपतिको कार्यालयबाट जारी विज्ञप्तिमा उक्त घटनालाई कुनै पनि हालतमा अनुत्तरित नछाडिने र यसमा संलग्न व्यक्ति वा समूहलाई कडा सजाय दिइने स्पष्ट पारिएको छ । राष्ट्रपति पेजेस्कियानले सर्वोच्च नेताको बलिदानले अमेरिकी-जियोनिस्ट दमन र अपराधविरुद्ध थप सशक्त प्रतिरोधको आधार तयार गर्ने दाबी गरेका छन् ।
उनले खामेनीको बलिदानलाई अन्यायविरुद्धको संघर्षको प्रतीकका रूपमा चित्रण गर्दै यसको प्रभाव दीर्घकालीन हुने बताएका छन् । साथै, इरानले आफ्ना सम्पूर्ण शक्ति, दृढ संकल्प र विश्वभरका इस्लामिक राष्ट्र तथा स्वतन्त्रताप्रेमी जनताको समर्थनका साथ घटनाका योजनाकार र कार्यान्वयनकर्तालाई कारबाहीको दायरामा ल्याउने प्रतिबद्धता जनाएको छ ।
यस घटनाप्रति शोक व्यक्त गर्दै इरान सरकारले ४० दिनको राष्ट्रिय शोक घोषणा गरेको छ । साथै, राष्ट्रपतिले सात दिनसम्म सार्वजनिक बिदा दिने निर्णय पनि गरेका छन् ।
इरानले यस घटनालाई आफ्नो सार्वभौमिकता र राष्ट्रिय स्वाभिमानमाथिको गम्भीर आक्रमणका रूपमा व्याख्या गर्दै आगामी कदमबारे आवश्यक निर्णय लिने जनाएको छ ।
प्रतिक्रिया