काठमाडौं । पश्चिम एशिया खाडी क्षेत्रमा विकसित पछिल्लो असहज परिस्थितिलाई मध्यनजर गर्दै सरकारले वैदेशिक रोजगारीका लागि दिइँदै आएको श्रम स्वीकृति अस्थायी रूपमा रोक्ने निर्णय गरेको छ।
सरकारको यस निर्णयसँगै साउदी अरब, संयुक्त अरब इमिरेट्स (युएई), कतार, कुवेत, बहराइन, ओमान, इराक, यमन, जोर्डन, लेवनन, टर्की र इसरायल गरी १२ देशका लागि तत्काल श्रम स्वीकृति स्थगित गरिएको छ।
श्रम, रोजगार तथा सामाजिक सुरक्षा मन्त्रालयले सम्बन्धित विभाग र मातहतका सबै कार्यालयलाई व्यक्तिगत तथा संस्थागत दुवै प्रकारका श्रम स्वीकृति अर्को निर्णय नभएसम्म जारी नगर्न निर्देशन दिएको जनाएको छ। मन्त्रालयका अनुसार उक्त निर्णय २०८२ फागुन १७ गते गरिएको हो।
यस कदमले खाडी र मध्यपूर्व क्षेत्रका साथै प्रभावित अन्य देशहरूमा रोजगारीका लागि जान तयारी गरिरहेका नेपाली कामदारहरू प्रत्यक्ष प्रभावित हुनेछन्।
सरकारले वर्तमान परिस्थितिमा नेपाली श्रमिकहरूको सुरक्षा र हितलाई उच्च प्राथमिकतामा राख्दै यस्तो निर्णय लिइएको स्पष्ट पारेको छ। अवस्था सामान्य भएसँगै आगामी कदमबारे पुनः निर्णय गरिने मन्त्रालयले जनाएको छ।
प्रतिक्रिया