काठमाडौं । भारत राष्ट्रिय क्रिकेट टोली आईसीसी पुरुष टी-२० विश्वकपको सेमिफाइनलमा प्रवेश गरेको छ । आइतबार राति भएको खेलमा वेस्टइन्डिज राष्ट्रिय क्रिकेट टोलीलाई ५ विकेटले पराजित गर्दै भारतले अन्तिम चारमा स्थान सुरक्षित गरेको हो ।
अब भारतले मार्च ५ मा इंग्ल्यान्ड राष्ट्रिय क्रिकेट टोलीसँग वानखेड़े स्टेडियम, मुम्बईमा सेमिफाइनल खेल खेल्नेछ ।
ईडन गार्डन्स, कोलकातामा भएको खेलमा टस जितेर पहिले ब्याटिङ गरेको वेस्टइन्डिजले निर्धारित २० ओभरमा ४ विकेट गुमाउँदै १९५ रन बनाएको थियो । रोस्टन चेजले ४० रन बनाए भने जेसन होल्डर ३७ रनमा अविजित रहे । भारतका जसप्रीत बुमराहले २ विकेट लिँदै विपक्षीलाई ठूलो स्कोर बनाउनबाट केही हदसम्म रोके ।
वेस्टइन्डिजले अन्तिम पाँच ओभरमा आक्रामक ब्याटिङ गर्दै ७० रन थपेको थियो । रोवमन पावेल र जेसन होल्डरले पाँचौं विकेटका लागि अविजित ७६ रनको महत्वपूर्ण साझेदारी गरे । त्यस्तै कप्तान शाई होप र रोस्टन चेजले तेस्रो विकेटका लागि ६८ रनको साझेदारी गर्दै टोलीलाई बलियो अवस्थामा पुर्याएका थिए ।
१९६ रनको लक्ष्य पछ्याएको भारतको सुरुआत कमजोर रह्यो । अभिषेक शर्मा र ईशान किशन समान १०-१० रनमा आउट भए भने तिलक वर्माले २७ र कप्तान सूर्यकुमार यादवले १८ रनको योगदान दिए ।
तर संजू स्यामसनले उत्कृष्ट प्रदर्शन गर्दै अविजित ९७ रनको निर्णायक पारी खेले । उनले ४ छक्का र १२ चौका प्रहार गर्दै भारतलाई जित दिलाए ।
यस जितसँगै भारतले सेमिफाइनलमा स्थान सुरक्षित गरेको छ भने उपाधि यात्रालाई निरन्तरता दिएको छ ।
प्रतिक्रिया