रामेछापमा निर्वाचन सामग्री बोकेको गाडी भीरबाट खस्यो

काठमाडौं । रामेछापमा निर्वाचन सामग्री बोकेको एक गाडी दुर्घटनामा परेको छ। भीरबाट खसेको उक्त गाडीमा मतपेटिकासहित निर्वाचन कर्मचारी र सुरक्षाकर्मी सवार रहेका थिए।

जिल्ला प्रहरी कार्यालय रामेछापका अनुसार गाडी खसेको सूचना प्राप्त भएसँगै प्रहरी टोली उद्धारका लागि घटनास्थलतर्फ प्रस्थान गरेको छ। “गाडी दुर्घटनामा परेको जानकारी आएको छ। हामी उद्धारका लागि जाँदैछौँ, गाडी नम्बर खुल्न बाँकी छ,” जिप्रका रामेछापका प्रवक्ता प्रहरी निरीक्षक राजन तिमल्सिनाले बताए।

उनका अनुसार मन्थलीबाट रामेछाप–२ र ३ का मतदान केन्द्रका लागि निर्वाचन सामग्री लिएर हिँडेको गाडी देउराली–सिरुबारी भीरमा खसेको हो। सो गाडीमा देउराली मतदान केन्द्रका मतदान अधिकृत तथा असई नेतृत्वको सुरक्षाकर्मी चढेका थिए ।

घटनाको विस्तृत विवरण र मानवीय तथा भौतिक क्षतिबारे जानकारी आउन बाँकी रहेको प्रहरीले जनाएको छ। प्रहरीले उद्धार कार्य तीव्र बनाइएको जनाएको छ।