नेपालगन्ज । बाँकेमा निर्वाचनको सम्पूर्ण तयारी पूरा भएको छ । प्रतिनिधिसभा सदस्य निर्वाचन २०८२ अन्तर्गत जिल्लाका सबै निर्वाचन क्षेत्रमा निर्वाचनको पूर्व तयारीका काम अन्तिम चरणमा रहेको जिल्ला निर्वाचन कार्यालयले जनाएको छ ।
कार्यालयका अनुसार सम्पूर्ण मतदान स्थल र मतदान केन्द्रहरुमा निर्वाचन सामाग्री सहित कर्मचारीहरु पुगिसकेका छन् भने मतदानस्थल निर्माणको काम पनि अन्तिम चरणमा पुगेको छ । अधिकांस बिद्यालयहरुलाई मतदान केन्द्र बनाइएको बाँकेमा मत गणना स्थलको निर्माण पनि अन्तिम चरणमा रहेको छ । नेपालगन्ज उपमहानगरपालिका २ मा मुख्य सडक नै अवरुद्ध गरि निर्वाचन स्थल निर्माण गरिएको छ भने अन्य अधिकांश स्थानहरुमा विद्यालय भवनलाई निर्वाचन स्थल बनाइएको छ ।
बाँके क्षेत्र नम्बर १ को अघैया स्थित राप्ती सोनारी गाँउपालिका भवन, क्षेत्र नम्बर २ मा भेरी प्राविधिक शिक्षालयको सभाहल र क्षेत्र नम्बर ३ मा कपास विकास समितिको भवनलाई मतगणना स्थल बनाइएको छ । मतगणना स्थलमा तारजाली लगाएर सुरक्षित बनाउने कार्य पनि अन्तिम चरणमा पुगेको छ । आज राति सम्ममा सम्पूर्ण निर्माणको काम सम्पन्न हुने जिल्ला निर्वाचन कार्यालय बाँकेका प्रमुख टेकबहादुर शाहीले जानकारी दिए ।
बाँकेमा क्षेत्र नम्बर १ मा ४८ मतदान स्थलमा १४१ मतदान केन्द्र रहेका छन् । यस क्षेत्रमा १ लाख २४ हजार ७२७ मतदाता रहेका छन् । त्यसैगरि बाँके क्षेत्र नम्बर २ मा ४३ मतदान स्थलमा १२४ मतदान केन्द्र रहेका छन् भने यहाँ १ लाख ८ हजार २९० मतदाता रहेका छन् । बाँकेको निर्वाचन क्षेत्र नम्बर ३ मा ४८ मतदान स्थलमा १३५ मतदान केन्द्र रहेका छन् । क्षे नम्बर ३ मा १ लाख १७ हजार ३५४ मतदाता रहेका छन् ।
बाँकेमा १ लाख ७२ हजार २२३ महिला, १ लाख ७८ हजार १३९ पूरुष र ९ जना अन्य गरि ३ लाख ५० हजार ३७१ जना मतदाता रहेका छन् ।
प्रतिक्रिया