मतदाताले नयाँ र पुरानो होइन, को सही र को गलत छ भन्ने छुट्याउनेछन् : प्रचण्ड

चितवन । नेपाली कम्युनिष्ट पार्टी (नेकपा)का संयोजक एवं पूर्वप्रधानमन्त्री पुष्पकमल दाहाल ‘प्रचण्ड’ले निर्वाचनपछि देश समृद्धिको मार्गमा अग्रसर हुने विश्वास व्यक्त गरेका छन् ।

भरतपुर महानगरपालिका वडा नं. १४ शान्तिपुरस्थित नेपाल पुुलिस स्कुल मतदान केन्द्र क बाट मतदान गरेपछि सञ्चारकर्मीहरुलाई सङ्क्षिप्त प्रतिक्रिया दिँदै उनले राष्ट्र र जनताका पक्षमा काम गर्ने उम्मेदवारलाई मतदाताले चयन गर्नेमा आफू ढुक्क रहेको बताए ।

संयोजक प्रचण्डले भने, “समृद्धितर्फको यात्रा निर्धारण गर्न यो निर्वाचन महत्वपूर्ण छ । उत्साहका साथ निर्वाचनमा सहभागी हुन आम मतदातालाई मेरो आग्रह छ ।”

उनले अहिले नयाँ र पुरानोको भाष्य बनाइएको भन्दै त्यो विल्कुल गलत रहेको बताए । अहिले नयाँ र पुरानो नभै सही र गलत भन्ने विषय महत्वपूर्ण रहेको उनको भनाइ छ ।

प्रचण्डले आफ्नो पार्टीले निर्वाचनमा राम्रो परिणाम ल्याउने दाबी पनि गरे ।