गोकर्ण विष्टको हारपछि मदानेका युवा संघ अध्यक्ष भट्टराईले दिए राजीनामा

गुल्मी । नेकपा (एमाले) निकट युवा संघ नेपालको मदाने गाउँकमिटीका अध्यक्ष दीपेन्द्र भट्टराईले पदबाट राजीनामा दिएका छन् । उनले गुल्मी-२ को प्रतिनिधिसभा निर्वाचनमा पार्टीका उम्मेदवार गोकर्ण विष्टलाई मदाने क्षेत्रबाट अपेक्षाकृत मत दिलाउन नसकेको नैतिक जिम्मेवारी लिँदै अध्यक्ष पदबाट राजीनामा दिएको घोषणा गरेका हुन् ।

भट्टराईले सामाजिक सञ्जालमार्फत वक्तव्य जारी गर्दै निर्वाचन परिणामको नैतिक जिम्मेवारी स्वीकार गरेका छन् । उनले फागुन २१ गते सम्पन्न संसदीय निर्वाचनमा नेकपा (एमाले) का तर्फबाट उम्मेदवार बनेका गोकर्ण विष्ट उपविजेता बनेको उल्लेख गर्दै मतदाताप्रति आभार व्यक्त गरेका छन् ।

उनले भनेका छन्, “प्रिय मदानेवासी युवा दाजुभाइ तथा दिदीबहिनीहरूलाई अभिवादन। फागुन २१ गते सम्पन्न संसदीय निर्वाचनमा गुल्मी-२ बाट नेकपा (एमाले) का उम्मेदवार गोकर्ण विष्ट उपविजेता बन्नुभएको छ । उहाँलाई सम्मानजनक मत प्रदान गर्नुहुने सम्पूर्ण मतदाताप्रति हार्दिक धन्यवाद व्यक्त गर्दछु ।”

आफू मदाने गाउँपालिकामा युवा संघको अध्यक्षको जिम्मेवारीमा रहेकाले निर्वाचन परिणामको नैतिक जिम्मेवारी लिँदै आजकै मितिदेखि अध्यक्ष पदबाट राजीनामा दिने निर्णय गरेको उनले बताएका छन् ।

भट्टराईले पार्टीको राष्ट्रिय नेतृत्वदेखि जिल्ला हुँदै पालिका कमिटीसम्मका नेतृत्वले पनि नैतिकता देखाउँदै आवश्यक निर्णय लिनुपर्ने सुझाव दिएका छन् ।