काठमाडौं । आयोजक भारतले आईसीसी टी-२० विश्वकपको उपाधि जितेको छ । फाइनल खेलमा न्यूजिल्याण्डलाई ९६ रनले पराजित गर्दै भारतले लगातार दोस्रो पटक विश्वकप ट्रफी उचालेको हो। यसअघि पनि भारतले २०२४ मा टी-२० विश्वकपको उपाधि जितेको थियो ।
अहमदाबादस्थित नरेन्द्र मोदी स्टेडियममा टस हारेर पहिले ब्याटिङ गरेको भारतले निर्धारित २० ओभरमा ५ विकेट गुमाउँदै २५५ रनको विशाल स्कोर बनाएको थियो । भारतका लागि ओपनर सञ्जु सैमसनले उत्कृष्ट प्रदर्शन गर्दै ४६ बलमा ८९ रनको शानदार पारी खेले । उनले ५ चौका र ८ छक्का प्रहार गरे ।
यस्तै अभिषेक शर्माले २१ बलमा ५२ रन र इशान किशनले २५ बलमा ५४ रन बनाउँदै अर्धशतक पूरा गरे । शिवम दुबे र हार्दिक पाण्ड्याले समान १८-१८ रनको योगदान दिए भने कप्तान सूर्यकुमार यादव शून्य रनमा आउट भए ।
न्यूजिल्याण्डका लागि जेम्स निशामले तीन विकेट लिए । उनले एकै ओभरमा सञ्जु सैमसन, इशान किशन र सूर्यकुमार यादवलाई आउट गर्दै टोलीलाई खेलमा फर्काउने प्रयास गरेका थिए । म्याट हेनरी र रचिन रविन्द्रले एक-एक विकेट लिए ।
२५६ रनको लक्ष्य पछ्याएको न्यूजिल्याण्ड निर्धारित ओभरमा लक्ष्य नजिक पुग्न सकेन । टोलीका अधिकांश ब्याट्सम्यान प्रभावकारी प्रदर्शन गर्न नसक्दा हार व्यहोर्नुपर्यो । टिम सिफर्टले २६ बलमा ५२ रन बनाउँदै अर्धशतक प्रहार गरे भने कप्तान मिचेल सेन्टनरले ३५ बलमा ४३ रन बनाए । तर यी योगदान जितका लागि पर्याप्त हुन सकेनन् ।
बलिङतर्फ भारतका जसप्रित बुमराहले उत्कृष्ट प्रदर्शन गर्दै ४ ओभरमा मात्र १५ रन खर्चेर ४ विकेट लिए । अक्षर पटेलले ३ विकेट लिए भने वरुण चक्रवर्ती, हार्दिक पाण्ड्या र अभिषेक शर्माले समान १-१ विकेट लिए ।
यस जितसँगै भारतले लगातार दोस्रो पटक टी-२० विश्वकप जित्दै अन्तर्राष्ट्रिय क्रिकेटमा आफ्नो वर्चस्व कायम राखेको छ ।
प्रतिक्रिया