कांग्रेसले टुंग्यायो २० समानुपातिक सांसदको नाम, निर्वाचनको समीक्षा अर्को बैठकमा

काठमाडौं । नेपाली कांग्रेसले प्रतिनिधिसभाको समानुपातिकतर्फबाट निर्वाचित हुने २० जनाको नाम टुंगो लगाएको छ।

आइतबार पार्टी केन्द्रीय कार्यालयमा बसेको केन्द्रीय कार्यसम्पादन समितिको बैठकले १५ जना महिला अनिवार्य रहने गरी २० जनाको नाम चयन गरेको हो।

बैठकपछि सञ्चारकर्मीहरूसँग कुरा गर्दै कांग्रेसका प्रवक्ता देवराज चालिसेले समानुपातिकतर्फ सिफारिस गरिएका २० जनामध्ये १५ जना महिला रहेको बताए । उनले प्रतिनिधिसभा र राष्ट्रियसभामा कांग्रेसका कुल ६२ सांसद रहने भएकाले संवैधानिक व्यवस्था अनुसार कम्तीमा एकतिहाइ अर्थात् २१ जना महिला सुनिश्चित गरिने बताए।

चालिसेले दलित, आदिवासी जनजाति, खसआर्य, मधेसी, मुस्लिम र थारू समुदायलाई समेट्दै क्लस्टरका आधारमा नाम चयन गरिएको जानकारी दिए। पार्टीले आदिवासी जनजाति र खसआर्यबाट ६–६ जना, मधेसी र दलितबाट ३–३ जना तथा मुस्लिम र थारूबाट १–१ जना गरी २० जनाको नाम निर्वाचन आयोगमा सिफारिस गर्ने निर्णय गरेको उनले बताए।

प्रवक्ता चालिसेले अर्को बैठकमा निर्वाचनको निर्वाचनको समग्र समीक्षा हुने जानकारी दिए । उनले आगामी बैठकमा निर्वाचन परिणाम र पार्टीको रणनीतिबारे विस्तृत छलफल गरिने बताए।