काठमाडौं । राष्ट्रिय स्वतन्त्र पार्टी (रास्वपा) को केन्द्रीय समितिको बैठक आज बस्दैछ । बैठक अपराह्न ४ बजे पार्टी कार्यालय वनस्थलीमा हुने प्रवक्ता मनिष झाले जानकारी दिएका छन् ।
बैठकमा रास्वपाको संसदीय दलको नेता चयनसम्बन्धी विषयमा छलफल हुने बताइएको छ । दलको विधानमा आवश्यक संशोधन गर्नुपर्ने भएकाले उक्त विषय टुंग्याउन केन्द्रीय समिति बैठक बोलाइएको हो ।
बैठकमा सबै केन्द्रीय सदस्यलाई अनिवार्य उपस्थितिका लागि निर्देशन दिइएको छ । विधान संशोधन प्रक्रिया पूरा भएपछि संसदीय दलको बैठकबाट वरिष्ठ नेता बालेन शाहलाई दलको नेता चयन गर्ने तयारी रहेको जनाइएको छ ।
दलको नेता चयन भएसँगै रास्वपाले राष्ट्रपति कार्यालयलाई औपचारिक जानकारी गराउनेछ । त्यसपछि रामचन्द्र पौडेलले संविधानको धारा ७६ (१) अनुसार बहुमत प्राप्त दलको नेतालाई प्रधानमन्त्री नियुक्त गर्ने प्रक्रिया अघि बढाउनेछन् ।
गत फागुन २१ गते सम्पन्न प्रतिनिधिसभा सदस्य निर्वाचनमा रास्वपाले प्रत्यक्षतर्फ १२५ र समानुपातिकतर्फ ५७ गरी कुल १८२ सिट जित हासिल गरेको जनाएको छ ।
प्रतिक्रिया