बुटवल । पश्चिमाञ्चल यातायात व्यवसायी समिति (ट्रक) को नेतृत्वका लागि युवा व्यवसायी पंकज राईले उम्मेदवारी घोषणा गरेका छन् । बुटवलमा आयोजित पत्रकार सम्मेलनमार्फत राईले आसन्न नेतृत्व चयन प्रक्रियामा स्वतन्त्र रूपमा उम्मेदवारी दिने घोषणा गरेका हुन् ।
बुटवलमा केन्द्रीय कार्यालय रहेको उक्त समितिमा करिब २ हजार ट्रक आबद्ध रहेका छन् । समितिको २५ औँ साधारणसभा तथा १४ औँ अधिवेशन आगामी चैत २१ गते हुने तय भएको छ । सोही अधिवेशनलाई लक्षित गर्दै राईले १४ बुँदे कार्ययोजना सार्वजनिक गरेका छन् ।
राईले व्यवसायी, स्वरोजगार श्रमिक र मजदुरबीच समन्वय, एकता र सहकार्यको वातावरण निर्माण गर्ने आफ्नो प्राथमिकता रहेको बताएका छन् ।
उनका अनुसार सडक दुर्घटना व्यवस्थापनलाई सहज बनाउन मोबाइल एपमार्फत द्रुत समाधान प्रणाली विकास गरिनेछ । साथै व्यवसायीमैत्री कानुन निर्माणका लागि पहल गर्दै अव्यवहारिक तथा व्यवसायीविरोधी नियमहरूको सुधारमा जोड दिइने उनले बताए ।
चालक तथा सहचालकको सामाजिक सुरक्षा, बीमा, तालिम र नियमित स्वास्थ्य परीक्षणको व्यवस्था सुनिश्चित गर्ने प्रतिबद्धता पनि उनले व्यक्त गरेका छन् । साथै दुर्घटना बीमा कार्यक्रम सञ्चालन र चालक स्वास्थ्य परीक्षणलाई प्राथमिकतामा राखिने उनको भनाइ छ ।
राईको उम्मेदवारीसँगै समितिको आगामी नेतृत्व चयन प्रक्रिया थप प्रतिस्पर्धात्मक बन्ने देखिएको छ ।
प्रतिक्रिया