बुटवल । इलाका प्रहरी कार्यालय बुटवलले सञ्चालन गरेको ‘अपरेसन साइलेन्ट स्ट्रिट’ अभियानअन्तर्गत शनिबार राति करिब दुई दर्जन मोटरसाइकल नियन्त्रणमा लिइएको छ । कालिकापथ क्षेत्रमा केन्द्रित भई सञ्चालन गरिएको उक्त अभियान राति ९ बजेदेखि सुरु गरिएको थियो । विशेषगरी चर्को आवाज निकाल्ने, स्वरूप परिवर्तन गरिएका तथा मादक पदार्थ सेवन गरी सवारी चलाउने चालकहरूलाई लक्षित गर्दै अभियान अघि बढाइएको हो ।
प्रहरी नायव उपरीक्षक निशान्त श्रीवास्तवका अनुसार बजार क्षेत्रमा ध्वनि प्रदूषण र लापरवाहीपूर्ण सवारीका कारण जनजीवन प्रभावित हुनुका साथै दुर्घटनाको जोखिम बढ्दै गएपछि यस्तो अभियान सञ्चालन गरिएको हो । उनका अनुसार करिब दुई घण्टाको अवधिमा नै ठूलो संख्यामा मोटरसाइकल नियन्त्रणमा लिइएको र सम्बन्धित धनीमाथि कानुनी प्रक्रिया अनुसार कडा कारबाही गरिनेछ ।
प्रहरीले यसअघि पनि बुटवल क्षेत्रमा यस्ता मोटरसाइकलमाथि निगरानी तथा कारबाही अभियान सञ्चालन गरेको थियो । केही समय शान्त रहेको अवस्था पछिल्लो समय पुनः बिग्रन थालेपछि ‘अपरेसन साइलेन्ट स्ट्रिट’ अभियानलाई थप प्रभावकारी बनाउँदै अन्य क्षेत्रमा समेत विस्तार गर्ने तयारी गरिएको प्रहरीले जनाएको छ ।
प्रतिक्रिया