काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी) ले राजश्व चुहावट र ठगी मुद्दामा सजाय तोकिएर फरार रहेका दुई अभियुक्तलाई पक्राउ गरेको छ ।
सीआईबीका अनुसार राजश्व चुहावट मुद्दामा उच्च अदालत पाटनको २०८१ वैशाख १७ गतेको फैसलाअनुसार ४ करोड ४४ लाख ८७ हजार ९५७ रुपैयाँ जरिवाना र १ वर्ष कैद सजाय तोकिएका सर्लाही ब्रह्मपुरी नगरपालिका-२ का ३१ वर्षीय प्रविण कुमार महतोलाई पक्राउ गरिएको हो । हाल काठमाडौंको कुलेश्वरमा बस्दै आएका उनलाई चैत २७ गते कुलेश्वरबाट पक्राउ गरी फैसला कार्यान्वयनका लागि जिल्ला अदालत ललितपुरमा पेश गरिएको छ ।
यस्तै, ठगी मुद्दामा उच्च अदालत पाटनको २०८२ वैशाख २ गतेको फैसलाअनुसार २५ हजार रुपैयाँ जरिवाना र २ वर्ष ६ महिना कैद सजाय तोकिएका बाग्लुङका ५२ वर्षीय महेन्द्र केसीलाई पनि पक्राउ गरिएको छ । काठमाडौंको सामाखुसीमा बस्दै आएका केसीलाई चैत २७ गते त्यहीँबाट पक्राउ गरी फैसला कार्यान्वयनका लागि जिल्ला अदालत ललितपुरमा पेश गरिएको प्रहरीले जनाएको छ ।
केसी युनिटी लाइफ इन्टरनेशनल लिमिटेडका सञ्चालकसमेत रहेको प्रहरीले उल्लेख गरेको छ । दुवै अभियुक्तविरुद्ध आवश्यक कानुनी प्रक्रिया अघि बढाइएको सीआईबीले जनाएको छ ।
प्रतिक्रिया