काठमाडौं । युट्युबर रोशन पोख्रेल हाजिर जमानीमा रिहा भएका छन् । प्रधानमन्त्री बालेन्द्र शाहमाथि अश्लील तथा आपत्तिजनक शब्द प्रयोग गरी भिडियो पोस्ट गरेको आरोपमा पक्राउ परेका उनलाई आइतबार रिहा गरिएको हो ।
उनीलाई चैत २६ गते पाँचथरको फाल्गुनन्द गाउँपालिकाबाट पक्राउ गरिएको थियो । विद्युतीय कारोबार ऐन, २०६३ अन्तर्गत कसुर गरेको आरोपमा जिल्ला अदालत पाँचथरबाट १० दिन हिरासतमा राख्न अनुमति समेत लिइएको थियो ।
जिल्ला प्रहरी कार्यालय पाँचथरका अनुसार हिरासतमा रहँदा स्वास्थ्य समस्या देखिएपछि उनलाई हाजिर जमानीमा परिवारको जिम्मा लगाएर रिहा गरिएको हो । उनलाई हजुरआमा र काकाको जिम्मा लगाइएको प्रहरीले जनाएको छ ।
यद्यपि, पोख्रेलविरुद्धको मुद्दा भने यथावत् रहनेछ । म्याद थप भइसकेकाले उनी बाहिर रहेरै अनुसन्धान प्रक्रिया अगाडि बढ्ने प्रहरीले स्पष्ट पारेको छ ।
उनको पक्राउप्रति विभिन्न पक्षबाट आलोचना भएको थियो । जेनजी मुभमेन्ट नेपालले अभिव्यक्ति स्वतन्त्रताको हक सुनिश्चित गर्न माग गर्दै गिरफ्तारीको विरोध गरेको थियो । संगठनले अभिव्यक्तिकै आधारमा गरिएको कारबाहीले लोकतान्त्रिक मूल्य कमजोर बनाउने चेतावनी दिएको थियो ।
प्रतिक्रिया