काठमाडौं । गृहमन्त्री सुधन गुरुङ र नेपालका लागि जनवादी गणतन्त्र चीनका राजदूत चाड माओमिङबीच गृहमन्त्रालयमा शिष्टाचार भेटवार्ता सम्पन्न भएको छ ।
भेटमा राजदूत माओमिङले गृहमन्त्री गुरुङलाई बधाई दिँदै सफल कार्यकालको शुभकामना व्यक्त गरेका थिए । जवाफमा गृहमन्त्री गुरुङले नेपाल ‘एक चीन नीति’प्रति प्रतिबद्ध रहेको स्पष्ट पार्दै नेपालको भूमिमा चीनविरुद्ध कुनै गतिविधि हुन नदिने बताए ।
उनले नेपालको सार्वभौमिकता, स्वाधीनता र भौगोलिक अखण्डताको रक्षा गर्न सरकार सधैं सचेत रहने उल्लेख गरे । साथै, नेपालमा भिसा नवीकरण नगरी अवैध रूपमा बसेका चिनियाँ नागरिकलाई स्वदेश फिर्ता गर्ने प्रक्रियामा सहजीकरण गर्न चिनियाँ पक्षसँग अनुरोध गरेका थिए ।
भेटका क्रममा चीनको सहयोगमा सञ्चालित आयोजना समयमै सम्पन्न गर्ने, नेपाल-चीन रेलमार्ग निर्माण अघि बढाउने तथा द्विपक्षीय व्यापार सहजीकरणमा थप पहल गर्ने विषयमा पनि छलफल भएको थियो ।
दुवै पक्षबीच सीमाक्षेत्रमा हुने आपराधिक गतिविधि नियन्त्रणका लागि सहकार्य बढाउने विषयमा सहमति भएको छ । चिनियाँ पक्षले नेपालको सुरक्षा निकायको क्षमता अभिवृद्धिमा सहयोग गर्न सकारात्मक धारणा व्यक्त गरेको छ ।
साथै, सिन्धुपाल्चोकको तातोपानी नाकामा आवतजावतमा समस्या आएको भन्ने समाचारप्रति चिन्ता व्यक्त गर्दै राजदूत माओमिङले त्यस्ता सूचना भ्रामक रहेको स्पष्ट पारेका छन् ।
गृहमन्त्रालयका अनुसार भेटमा नेपाल-चीनबीचको ऐतिहासिक सम्बन्धलाई अझ सुदृढ बनाउँदै आगामी दिनमा सहकार्य विस्तार गर्ने सहमति व्यक्त गरिएको छ ।
प्रतिक्रिया