काठमाडौं । नेपाली कांग्रेसका सभापति गगन थापाले पार्टीका नेता–कार्यकर्तालाई एकताबद्ध हुन आह्वान गरेका छन्।
आफ्नो पक्षमा सर्वोच्च अदालतको फैसला आएपछि सभापति थापाले सामाजिक सञ्जालमार्फत सन्देश जारी गर्दै उक्त फैसलाले पार्टीलाई पुनः बलियो बनाउने साझा यात्रातर्फ अघि बढ्ने वातावरण तयार गरेको उल्लेख गरेका हुन्।
थापाले यो विषयलाई व्यक्तिगत जित–हारको रूपमा नभई विधि, प्रक्रिया र लोकतान्त्रिक अभ्यासको रूपमा लिनुपर्ने धारणा राखेका छन्। “सम्मानित सर्वोच्च अदालतको निर्णयले पार्टीका सबै साथीहरूलाई एकताबद्ध बनाउँदै पार्टीलाई फेरि बलियो बनाउने साझा यात्रामा अघि बढ्ने वातावरण बनाएको छ,” उनले भनेका छन्।
उनले देशभित्र तथा बाहिर रहेका पार्टी सदस्य र शुभेच्छुकहरूलाई आ–आफ्नो स्थानबाट जिम्मेवारीपूर्वक पार्टीको एकता र पुनर्जागरणका लागि सकारात्मक भूमिका खेल्न आग्रह गरेका छन्। सभापतिको हैसियतले यस प्रक्रियामा सबैभन्दा ठूलो जिम्मेवारी आफूमा रहेको स्पष्ट पार्दै उनले त्यसअनुसार सक्रिय रूपमा लाग्ने प्रतिबद्धता व्यक्त गरेका छन्।
थापाले पार्टीको पन्ध्रौँ महाधिवेशनको प्रक्रिया अघि बढिसकेको उल्लेख गर्दै त्यसलाई सफल बनाउँदै संगठनलाई रूपान्तरण र सुदृढ गर्ने अवसरका रूपमा उपयोग गर्नुपर्ने बताएका छन्।
अग्रजहरूको योगदानको सम्मान गर्दै नयाँ पुस्ताको आकाङ्क्षा सम्बोधन गर्न सक्ने र समुन्नत नेपाल निर्माणमा योगदान दिने बलियो पार्टी निर्माणका लागि सबै एक ढिक्का भएर अघि बढ्नुपर्नेमा उनले जोड दिएका छन्।
प्रतिक्रिया