बुटवल । दोस्रो लखन कप नकआउट फुटबल प्रतियोगिताको तयारी अन्तिम चरणमा पुगेको छ ।
वैशाख ११ गतेदेखि हुने दोस्रो लखन कप नकआउट फुटबल प्रतियोगिता २०८३ को तयारी पूरा भएको शनिबार बुटवलमा पत्रकार सम्मेलन गरि आयोजक लखन ब्रदर्श युथ क्लबका अध्यक्ष सुदिप खत्रीले बताए ।
बुटवल उपमहानगरपालिकाको संरक्षकत्व तथा लखन ब्रदर्श यूथ क्लबको आयोजनामा बुटवलको रामनगरस्थित खेल मैदानमा सञ्चालन हुने प्रतियोगिताका लागि एक महिनादेखी मैदान मर्मत तथा स्थाई स्टेज तयार भएको उनले बताए । यसअघि पहिलो संस्करण सिद्धेश्वर मैदानमा आयोजना गर्दा समेत पूर्वाधारमा खर्च भएको भन्दै उनले यो संस्करणमा समेत करीब २ लाख रुपैया भन्दा बढी मैदानमा खर्च हुने उनले बताए ।
प्रतियोगिताको उपाधि विजेता टिमले नगद ३ लाख १ हजार १११ रुपैयाँ, कप, मेडल र प्रमाणपत्र प्राप्त गर्ने छन् भने उप विजेताले नगद १ लाख ५१ हजार १११ राशीसहित कप, मेडल, प्रमाणपत्र प्राप्त गर्ने छ । यसैगरि विधागत रुपमा सर्वोत्कृष्ट खेलाडीलाई नगद २० हजार १११ पुरस्कार प्रदान गरिने आयोजकले जनाएको छ । यसैगरी सर्वाधिक गोलकर्ता, उत्कृष्ट गोल रक्षक, उत्कृष्ट डिफेन्डर तथा उत्कृष्ट मिड फिल्डरलाई जनही १० हजार १११ रुपैयाँ नगद राशी पुरस्कार प्रदान गरिने भएको छ । प्रतियोगिता सम्पन्न गर्न १९ लाख बढी खर्च अनुमान गरिएको क्लबका सचिव निरन्जन पन्तले जानकारी दिए ।
प्रतियोगितामा रुपन्देहीसहित नवलपरासी, पाल्पाका १२ टिमले सहभागिता रहेको क्लबका संरक्षक तथा प्रतियोगिताका संयोजक राम बहादुर थापाले जानकारी दिए
।
आयोजकसहित सम्पूर्ण युवा क्लब सुपौली, देवदह ब्वाइज युवा क्लब, फर्साटिकर युवाक्लब, चाँदनी युवाक्लब दानापुर, योङ ब्वाइज खैरेनी, शिवनगर परिवार, तिलोत्तमा-११, न्यू युथ युनियन क्लब पाल्पा, सयपत्री युवा क्लब रामनगर, तारादल गण आर्मी, सुनवल एफसी सहभागी हुने भएका छन् ।
कार्यक्रममा बुटवल उपमहानगरपालिका वडा नं. ८ का वडाअध्यक्ष यज्ञ पंगेनीले खेलकुद र सामाजिक क्षेत्रमा क्लबबाट भएको कामको प्रशंसा गर्दै नगरकै उत्कृष्ट क्लबका रुपमा रहेको दाबी गरे ।
प्रतिक्रिया