काठमाडौं । दक्षिण तथा मध्य एसिया मामिला हेर्ने अमेरिकी सहायक विदेशमन्त्री पल कपुर तीनदिने औपचारिक भ्रमणका लागि सोमबार बिहान काठमाडौं आइपुगेका छन्।
काठमाडौंस्थित अमेरिकी दूतावासका अनुसार भ्रमणका क्रममा कपुरले अमेरिका–नेपाल सम्बन्धलाई थप सुदृढ बनाउने उद्देश्यसहित सरकारी अधिकारी, निजी क्षेत्रका प्रतिनिधि तथा सांस्कृतिक क्षेत्रका विज्ञहरूसँग भेटघाट गर्नेछन्।
राष्ट्रिय स्वतन्त्र पार्टी नेतृत्वमा नयाँ सरकार गठन भएपछि नेपाल आउने उनी पहिलो उच्चस्तरीय अमेरिकी कूटनीतिज्ञ हुन्।
भ्रमणका क्रममा उनले परराष्ट्रमन्त्री शिशिर खनाल र अर्थमन्त्री स्वर्णिम वाग्ले सँग छुट्टाछुट्टै भेटवार्ता गर्ने कार्यक्रम तय भएको छ। मंगलबार बिहान ९:३० बजे परराष्ट्र मन्त्रालयमा खनालसँग र त्यसपछि बिहान १०:३० बजे अर्थ मन्त्रालयमा वाग्लेसँग भेट हुने जनाइएको छ।
नेपाल बसाइका क्रममा कपुरले पाटन दरबार स्क्वायर को अवलोकनसमेत गर्ने कार्यक्रम रहेको छ।
प्रतिक्रिया