काठमाडौं । अमेरिकामा शनिबार राति आयोजित ह्वाइट हाउस संवाददाताको रात्रिभोजका क्रममा गोली चलेपछि राष्ट्रपति डोनाल्ड ट्रम्पसहित देशका शीर्ष नेताहरूलाई तत्काल सुरक्षित स्थानमा सारिएको छ ।
घटनापछि उपराष्ट्रपति जेडी भान्स तथा ट्रम्पको मन्त्रिपरिषद्का अन्य सदस्यहरूलाई पनि सुरक्षाकर्मीहरूले तुरुन्तै सुरक्षित रूपमा बाहिर निकालेका थिए । प्रारम्भिक विवरणअनुसार राष्ट्रपति, उपराष्ट्रपति र मन्त्रिपरिषद्का सबै सदस्यहरू सकुशल रहेका छन् ।
एक सुरक्षा अधिकारीका अनुसार कार्यक्रमस्थलमा एक बन्दुकधारीले गोली चलाएको पुष्टि भएको छ । सञ्चार माध्यमहरूको रिपोर्टअनुसार ट्रम्प पूर्ण रूपमा सुरक्षित रहेका छन् भने मन्त्रिपरिषद्का सबै सदस्यहरू पनि सुरक्षित अवस्थामा रहेको जनाइएको छ ।
रात्रिभोज चलिरहँदा युनाइटेड स्टेट्स सेक्रेट सर्भिसका एजेन्टहरूले ‘गोली चलेको’ भन्दै चेतावनी दिएका थिए । त्यसपछि रेडियो सन्देशमार्फत एक शंकास्पद व्यक्तिलाई नियन्त्रणमा लिइएको जानकारी गराइएको थियो ।
घटनापछि कार्यक्रमस्थल वासिङ्टन हिल्टनको भोज कक्षलाई सुरक्षाकर्मीहरूले घेरा हालेका थिए । सयौँ पाहुनाहरू ज्यान जोगाउन टेबलमुनि लुकेका थिए भने सुरक्षाकर्मीहरूले सबैलाई तल झुक्न र सुरक्षित मार्गतर्फ जान निर्देशन दिएका थिए ।
प्रत्यक्षदर्शीहरूका अनुसार पाँचदेखि आठ राउन्डसम्म गोली चलेको आवाज सुनिएको थियो । ट्रम्पको सम्बोधनको प्रतीक्षामा रहेका सयौँ वरिष्ठ पत्रकार, सार्वजनिक व्यक्तित्व र नेताहरूबीच हल तत्काल खाली गराइएको थियो ।
घटनापछि नेसनल गार्डका सदस्यहरूले भवनभित्र सुरक्षा व्यवस्था थप कडा पारेका छन् । मानिसहरूलाई भवनबाट बाहिर निस्कन अनुमति दिइए पनि पुनः प्रवेशमा रोक लगाइएको छ । होटल बाहिरको सुरक्षा व्यवस्था पनि कडा पारिएको छ र वरपरको क्षेत्रलाई सुरक्षा घेरामा राखिएको छ ।
यस प्रतिष्ठित कार्यक्रममा अमेरिकी सरकारका उच्च पदस्थ अधिकारीहरू, पत्रकारहरू तथा विभिन्न सार्वजनिक व्यक्तित्वहरूको उल्लेखनीय उपस्थिति रहेको थियो ।
प्रतिक्रिया